Kim Jong-Un-i Vietnam semdangtsü

Hanoi, Tsüklai/February 23 (Agencies): Taruba hopta Kim aser US tir Donald Trump na Honai nung majurutep tsüngda North Korea lenir Kim Jong Un-i Vietnam semdangtsü, ta ketdangsertemi Honibanrü metetdaktsü.
“Kim Jong Un-i anogo ishika tsüngda Vietnam semdangtsü,” ta Vietnam foreign ministry-i parnok indang Facebook page ajanga Honibarnü metetdaktsü.
Osang ajanga Kim-i Vietnam semdangtsüba anogo tejangjabo memetetdaktsü saka osang balala ajanga AFP dang Hokolbarnü ashiba agi, Kim February 25 mesera 26 nü train ajanga arutsü imlar.
Kim aser Trump na February 27 aser 28 nü tanabuba senden amentsü aser lenir ana yagi iba senden nung Pyongyang indang nuclear arsenal tem atongsatsü nükjidong yur ajuruteptsü.
Taoba küm lenir ana tsüngda mezüngbuba senden amenba sülen telemtetba ama mesüi Pyongyang-i denuclearize asütsü asoshi jenjang tapet magiba nguogo, ajisüaka tang amentsü aliba senden nung telemtetba tajung karbo agitsü imlaa atar.
Kim, Vietnam-i train ajanga aotsü imlar aser pa China arrtsü anasa Dong Dang train station nung anentsü aser Hanoi-i gari ajanga kilometer 170 aotsü.
February 26 nü 6:00 ako nungi 2:00 tashi lenmang nung gari kecha mesenzüdaktsütsü asoshi Hanoi-i jenjang agidar, ta Hokolbarnü media sangdong ajanga metetdaktsü aser ashiba agi Kim gari ka nung mener highway ajanga arutsü ta ashi.
Vietnam-i, Dong Dang station nung security tali akangshiogo aser iba den Hanoi-i aoba lenmang nunga security tali akangshiogo, ta AFP osangbenertemi item tesemtem nung Honibarnü prangbong bener sepaitem aika senzüa anguba sülen metetdaktsü.