Kim-Moon senden atema Korea ana lenirtem ajuruteper

Seoul, Metsüremi 24 (Agencies) : April ita nung North Korea lenir, Kim Jong Un aser South Korea Tir, Moon Jae-in na temaba jenjang nung senden ka amentsü aliba atema renemshitsü asoshi taruba hopta nungji temaba jenjang nung ken o lemtepa jembitsü atema Korea linük anaprongi mulunga renemogo, ta tanü Küptoknü South Korea-i osang ka metetdaktsüogo.
North Korea nungeri inyakba nuclear sentong ajanga koba mangatettep adoka lir, ibaji angatettepa jembitsü aser tesendaktep akangshia yanglutsü nükjidong nung tang temaba jenjang nung senden akatsü sentong yanglur.
Tan taruba Yangtepnü arrtsülen Panmunjom yimdak akatsü aliba senden nungji South nungi teshimtet purtemji Unification Minister Cho Myoung-gyon-i anir adentsü.
Unification Ministry ajanga ashiba agi, iba mapang temaba menden nung lenir ana senden amentsü atema anogo shimtettsü aser tongtibang agenda indang lemteptsü.
North nungi teshimtet purtemjia inter-Korean affairs reprangba agency nung mendenbuba, Ri Son Gwon-i anir adentsü.