Kimai maoba tebilemtsü !

Akhidangbo tsüraburtemi pei chirnurtem dang kimalen kangabo mesenzüi kidang ki mapa nung yaritsü mesüra lesson bushia kazütsü asoshi ajungshiasa liasü, saka tanübo jet ta meyiper tsüraburtemi tanurtem dang kilong nung dang mekazüi kimalena khenkhenbo memdemertem den lokti aser arogo nung shilem agia senzütsü ajungshitsüsa putu tensai bener arutsüogo. Tanü putu tasen nung temelenshi tasen aika aruba rongnung kaji ibaji asütsü, kechiyong tanurtem aika asoshi pei medemertemji nisung masü saka computer mesüra mobile phone kümogo. Ibayongji, kidang tsürabur aser adianutem den sensaksema kazütsü melen computer nung mesüra mobile phone nung anguoker internet ajanga alima nung kechi reprangner aser kechi metetner, itemji repranga takdang telong kazüba agi amang sangwa memetet süitemdaktsür. Kongia moi kidang takdang nung ola madoki mobile amshia kazür asünungji, ashiko, tsüraburtemibo tanurtemji lesson bushir südi ta bilema alitsüa akok, ajisüaka tanü asüng tanurtem aika dak kaket azüngba sobaliba mali kümogo. Atangji, computer mesüra mobile phone nunga internet  ajanga tagitsü tazüngtsü kaket aika angutsü, ajisüaka computer aser mobile phone screen nung azüngba agibo tangar den toktepa tajung akümtsübo makoktsü. Joko, tanurtem teimbaka aonung piyong mobile phone amshiba nung dang mapang endoker asünungji anepdang mesaktetter, anungji talisa college azüngertembo class-i mao mejanga amonger.Aji oda, lanurtem aika asoshi tanü putu ya aonung memejangi mobile nung olamadoki  medemertem den shidi zülutepa kazütsü aser anüngdang tepiyong amui oa amongtsü ta asüba putu kümogo. Item tanurtem jagi ajak metetter amato asütsü saka taküm nung tagitsü mapa inyaktsüsa tatidang agütsütsüsa mesüra sentong ka nung shilem agitsüsa mapang arudangbo kecha meinyaktettsü. Ano tanurtemi mobile phone aser computer amshiba nung lendong kaji parnok aikati computer games nung shilem agir aser item asayaji asaya-asayaa peisasa suseta asütsü tashi mulungtetdaktsür. Ibaji dang masü saka internet ajanga alima shi azü apong noksa tamajung, tebang agibo jembitsüla masüba taaktsü noksatem aika enokja lir, itemji mereprangli asüyonga pasasa aruadoker aser lanurtem aika mashileni anir. Tanü nisung aika pei shi azü mazüoktet tashiyim agi tangar taküm raksatsütsü merangba mapatemji item noksa tamajung reprangba ajanga atalokba teimba asütsü. Item tatidang aser lendong agi sünga aliba putu ka nung tanü tanurtem aienba tensa tia ya tsüraburtemi kanga junga angatettsü nüngdaker. Joko tanü putu nung computer aser mobile phone ya akhidang amshiba longpak pencil amai ka dang kümadokogo, anungji tanurtem asoshi itemji amshi ashitsü kanga nüngdaker. Joko, alima agi ojang asünungji, tsüraburtemia computer aser mobile phone nung internet ajanga tongtepratepba maparen balala meteta alitsü kanga nüngdaker. Computer aser mobile phone amshibaji ajak tamajungbo masü saka tajunga aika lir, kechiyong itemji nisungtem asoshi tajung aser tajangzük angutsü asoshi yanglu, anungji asenok mapaji tajung o tamajung na tsüngda bendangteta amshi ashitsübaji asütsü. Itemji amshiba ajanga taküm raksarji ta bilema asenoki tanurtem nem computer aser mobile phone mamshidaktsübaji , tanü putu nungbo, school-i onüseta moudaktsüi sota ayu amato asütsü. Tajung kaji, akhidangbo lesson bushidang temetetnüba kar bushitsü nüngdak adokra, itemji zülua aliba kaket bushitsüsa aküm aser aiben bushiaka mengutet, saka tanübo asenoki metetnüba tetezü aser otsü ajak internet ajanga computer aser mobile phone nung reprangtsü akoker, iba jagi lesson bushidanga tesayur tajung danga taoba teyari angur. Item tajungtemji meteta kodang tsürabur aser tanurtem ajaki mobile phone aser computer amshidir, item jagibo shisatsü aser temetetba renlokdaktsütsü. Asenok ajak atema teinyaktsü kaji, mobile amshiba ajanga kibong tekülem magitettsüsa, aonung amui maotsüsa, anüngdang amui oa amongtsüsa, kaket mazüngtsüsa, soruchiok menutsüsa aser tanurtem lokti aser arogo nung shilem magitet akümtsüsa yimya mesübatsüla.