Kimyimer Penzü shidi

– Wapangrenba Imchen.

Linok yuogo, meyi mapang süitema arur aser mongpu kishizüng nung lir; Kiyimer tsüngküm aruogo. Kiyong nung ayaterem talaktsüka asatepba ola aiben, ya yimdong nung tanur asaperang ola masü saka ken mapang ka merena kiyimba kibongtem nungi rarapangsen ola liasü. Ki tsüngta lemmang ajanga süia aodang yaküm yimnet semer jaoka kiyir benjong tulu agiba kibong to ita ishika tsüngda balar terenemtet kiyimsang to-a joko yi agi longtoka meseper kelentsü nung ontaka lia meso. Tebenjem jala ka ta kibong nung ajaki tushia dang benshia lia arur küm ana tejaklen ki ayim saka ngangpa opet joko balar amitsür a masü aiür a masü, tenipong mesonga sali mangemer, pan dokan kima opung nung sükshia lia ajuru.
Kari ashi tsüraburi jembitsür aliba agi keni jakla mengutepi liteptetji kongang atongsemtetsü. Tangar kari ashi küm ishika jembia arur kibong akumago saka aiwa asangwa mapang meimtepa aser tenangzükba to tzürong nung ken tentokang mesüka liasü. Maneni ano kar bang nungi angashi, aya tsüraburi kibong nung arua amushir, par kinunger khuret ajak pongloker tangu mesatet kena kibong masü akumji odang tembangogo. Balalula kulitem chi sünger molok a moshia angashi dang shisadanger; arogoi jili kiyim sayubentsü (pre-marital counselling) shidak magütsür asü? Kiyi mayimdang anepalua jembitepba aser meimtepba yimya tajung to joko mezüsenteti pentok kümdaktsü asü? Anojungi kibong aküm asü? Tsürabur kidang alidang onsara jangratema aliyong kecha mashi aser tzürapur den lia aruba jangratem dang menungra-a khuret magizükteter asü? Kibong kümdang masüji ni kecha memetet saka kü medemertem, kü kiyonger kibong balalula nungji kümzükdaktsünüa bilemyong kiyimer atema shisadangba iba shidi.
Charles Lindberg-i tayimtsü nung Atlantic ajanga mezüngbuba yimdangba agi alima süngmangdaktsü. Pai ashiba agi United states ajanga Canada aser Newfoundland atendangdang pai tayimtsü nungi ali reprangzüka yokli aser tayimtsü raksa nungbo kong anentsü iba tesem benzüli tasa senzü. Saka kodang Atlantic tzüyim atendanga ayimtsü tenzük, tanenzükdak aser meyipa aotsü kecha kuli mali odang ayimtsüji dang kuli ajak agi liasü. Aji oda süaka Lindberg-i ayimtsü molungtet aser kulisütsü otsüji yanglu. Ravi Zachariai zülu, ‘temeimji temolungtetba aser shisatsü anabrong atema tasüngdangba tulu ka lir, aser nai nisung ka meimtsü molungtetra aji nai meimtetsü.’ Kibongji temeimtep, tepela aser tesünep agi moshia anogoshia alitsü asü? Masü, saka temolungtetba agi itemji kumzüktet; Khrista aser arogo tsüngdang tenangzükba anogo shia bilemteta meranga züsentetba agi kibongji temsüa temjena kümzüktet. Apijemtsü shin züluri ashi ‘Saka temeimi tai ajak nembanger’(A.Shin 10:12b).
Kiyimer tsüngkum arudang Arogoia jili kiyim sayubentsü (pre-marital counselling) senti süa bilemdaktsünüa iba shdti zulur. Kibong kümer joko tatsüka lia arudang mepetmesü kar agi yirongdakja alinunga, kiyimla tenlaki lendi tiyongi na ajurutsü atuba; kiyimsang na tenlaki sabang nung ata-a aliba topur tajung mapang  menungra-a shilua temeim meranga inyaka alitsü bilemtetdaktsünüa zulur. Kiyimba kulizüng magii kibong akumertem asoshia ne mezüng temeim la aser pa asoshi koba liasü, ibaji shiludaktsünüa zulur. Arua aliba  tsüngküm kiyimertem koba tensa ka nung aser kechi koma lenla ka ajanga kibong akumtsü lidir liaka, Khrista aser arogo tsüngdang koba tenangzüktsü ali ibaji temolung taroktiba agi atangji agizüka nangzükangma ta mepishia zülur. Maneni ano zulur, onok kiyir benjongi arurtema ‘sati card’ angudang menemnemli, yimyasüpaba pangpet ‘aha! taküma joko…’ ta mejembili saka ner asoshi temoatsü meshija sarasadema kiyir benjongdagi arudi.