Kin ajak adenba budget ka renemtsü: Assam CM

Guwahati, February 26 (Agencies): Assam sorkari state nung aliba kin balala alizüngtem aser taginübatem adenba budget ka renemtsü ta chief minister Sarbananda Sonowal-i Bodbarnü metetdaktsü.
Dispur nung Chief minister Sonowal-i Assam nung aliba kin balala nungi teshimtet nisungtem den ajurutepa senden ka amen.
Senden nung Sonowal-i kin balala dang parnok indang lokti-rongsenkettsüng tia ajungkettsü atema tebilembatem asüngdanga liasü.
State sorkari sobaliba, oshi aser inyaksangshitem kümzüka ayutsü atema mapa inyaka arur. State sorkari lisopur nem land pattas agütsütsü atema mapa tenzükogo aser March 2020 tashi nung nisung lakh 1 nem land pattas agütsütsü, ta paisa metetdaktsü.
Maneni, taruba financial year nunga nisung lakh ka nem land pattas agütsütsü, ta Sonowal-isa shisem.
Assam nung aliba kin balala alizüngtem aser taginübatem asoshi state sorkari schemes aser programmes tenzüka inyaker, ta paisa ashi.
Iba senden nung Moran, Mattak, Tea tribe community, Koch Rajbongshi, Tai Ahom, Adivasi, Santhal kintem nungi teshimtet nisungtem aden.