Kin hohotem züngdokba atema mepelar: ASTD

Dimapur, May 7 (TYO): Dimapur Deputy Commissioner, Anoop Kinchi, IAS-i May 6, 2020 nü COVID-19 wara azüoktsü dak sendakba nung senden ka ayongdang, kin hohotem züngdokba atema mepelar, ta Ao Senso Telongjem Dimapur (ASTD)-i metetdaktsüogo.
Iba senden nung tangalen nungi Nagaland-i arurtem ateam onük benoka lemsatep aser Finance Commissioner Sentiyanger Imchen aden.
Naga kin tulutem ajak indang Kin Hoho kongsangtem Dimapur nunga tenteta lir. Eastern Naga People’s Organization, Naga Tribal council, Central Nagaland Tribal Council teloktem den Dimapur Naga council aser Dimapur Apex Tribal Hohos lir aser item teloktem rongnung ASTD-a tongtipang shilem ka lir. Ajisüaka, Dimapur DC-i senden ayongba nung kin teloktem, Civil Society tem aser NGO tem mejaokba ajanga state nung lisopurtem ratateper, ta ASTD-i ashi.
Ano, ketdangsertemi telok kar dang shimteter jaokba ajanga Naga kin balala tsüngda mangatettep aser mulung malemtep adokdaktsüogo. Iba ama wara tulu ajurua aliba tensa ka nung state nung alir ajak longjemer inyak nung dang takok angutsü, ta ASTD-isa metetdaktsü.
Nagaland nung lisopurtem, Civil Society aser NGO dena kin teloktem medenra, sorkar kija agi dangbo state indang khurettem mekoktettsü aser shisatsü peria mangutsü, ta ASTD Tir L. Wati Jamir aser Tongti Tezülur K. Mar Lemtur nati sangdong ka nung ashi.