Kin ka renloktsüba maparen nung tetsürtem shilem tulu lir

Waromung, Jan. 07 (TYO) : Kibong ya tetsürtem dak amendaka lir, anungji loktiliba renloktsüba maparen nung tetsürtem shilem tuluka lir ta North East Zone Cultural Centre (NEZCC) nung Director, Wb.Lipokmar Tzudiri metetdaktsü. Pai iba o ya tanü Brehostibar nü Waromung yimtak Changkikong Kaketshir Mungdang lokti senden nung jembidang metetdaktsü.
Tetsürtemi alima kin ka asoshi inyaktsüba tashiji tang yimten nung menden 33% shiteta yutsütsü jembiba shilem dang nungi kanga agia tuluba lir ta paisa ashi.
Tetsür ya kibong tamendakdak aser kibongji lokti tamendakdak, aser loktiji kin ka tamendakdak, anungji tetsür ka dak kibong anepalutsü khuret dang masü saka lokti rongsenren aser kin ka aienba nung tongtibang shilem agitsüsa tashi tuluka lir ta NEZCC Directorisa metetdaktsü.
CKM lokti senden omen “Peisasa taküm litettsü merangba” nung ajemdaker, tajungshi o ka ashidang, tamasa asenok tangatetba melenshitsüla ta paisa metetdaktsü.
Europe aser America nungertemi oset tapu balala yanglur aser itemji ajizüka China nungertemi yanglur aser itemi Miya nungertemi alizüka bener arua ayoker aser asenoki alir ta NEZCC Directorisa metetdaktsü.
Iba tensa tia ya meyipteptsüla aser Naga nungertem ajaki pei akok inyaktsüla aser aluyimba dangi meyiptsüla ta Lipokmar Tzüdirisa metetdaktsü.
Tanü lima nung takar a melamelaa kümtetter aser yamaji sensaker a melemelaa küma aor, anungji iba ana rongnungji peisasa shimtettsü ta NEZCC Diectorisa metetdaktsü.