Kin ka samatsütsüba tashi

Kenü asen lima raksaba aser majungba indang shisabolua bilema alidang, ni adenba Whatsapp group ka nung lenir kati taoksatsü saka tagitsü osang ka yok. Iba osangji zünger kü mulung nung kanga shishia süoki ia bilem aser iba yabo nübortem dena lemsateptsü nüngdak ta angatet nung, yangi tanübo iba osangji lemsateper. South Africa nung University ka nung Professor kati pai sayuba kaketshirtem nem angatetdaktsütsü asoshi temulung atangtsü o kar zülur University süngküm nung toktsü. Iba nungji yamai zülua liasü: “ Kin ka laodaktsütsü mesüra samatsütsü asoshi atom bomb amshitsü menüngdaker mesüra lenlang nungi tangar lima raksatsütsü asoshi long range missile yoktsüa menüngdaker, saka kaketreju nung kaketshirtem dang kaketshisatsü tajung magütsütsüla aser lesson mebushiyonga tatidang mapang kaket repranga ajizüka züludaktsür takok ngudaktsütsüla.” Iba amaji kodang kaketshir aser lanurtem intetdaktsüdir, kopi melii kecha memetet ajizüka zülur takok angusang medical doctor ket nung mozü kidang asenok asütsü; kopi melii kechabo memetet saka ajizüka zülur takok angusang Enginner-i yangluba ki aser apu chirepa asenok asütsü; kopi melii kechabo memetet saka ajizüka zülur takok angusang Accountant ket nung asenok sen ajak samatsü; kopi melii kechabo memetet ser ajizüka zülur takok angusang arogo lenir ket nung memchir ajak metsüdaktsü, kopi melii kechabo memetet saka ajizüka zülur takok angusang obendanger ket nung ochiobendang mali akümtsü aser kecha memetet aser mazüng saka ajizüka zülur takok angur tesayurtemi sayuba tanurtem kolokji tazüng, kecha mashi aser memetetba purtem akümtsü. Aji oda, kaketshisatsü junga mesayuteti laobaji kin ka laor asütsü. Tanü Nagaland laoba ya center government-i memeimba agi masü mesüra sen peria magütsüba agia masü saka asenoki asenoksasa government school-tem laodaktsüba ajanga Nagaland kanga topur mejungi raksaa lir. Africa University nung tesayursangi ashiba ama, shitakba ochi kaketshisatsü koba agi pei lima aser nübortem meima tenzüktsü sayur, ibajibo junga mesayu aser mazüng ser degree bener arua tulur menden nung amenba agi asenok kaketreju nung kaketshisatsü mangur, mozü kidang taneptsü mangur, obendangdak ochiobendang mangur aser sen amshir shingaia ochishia meinyaktetter. Aji oda, kenü yimten lenir kati election mapang pa meyariba agi tesayur ka meta tatemi transfer yokba agi kaketreju lao tenzük, kenü yimten lenir kati kechabo memetet saka pa yarir asüba agi tesayur shimba agi kaketreju laotsü tenzük, kenü yimten lenirtemi par yarirtem  ajak pei mulungba tesem nung yutsüba agi school aika nung tesayur agi meperi aser aika nung tesayur talila akümba timtem agi kaketrejutem laoyonga ao. Aji oda, yimten lenirtemi kaketreju yanglutsü yokba sen chia adok, kaket mapang shitak nung magütsütet, tanurtem anüngdang chiyongtsü yokba chiyongtsü taintem chiyongtsü aküm. Shingaia kaketreju mesemdang, shingaia school junga agir asü magir hau ta mali, shingaia Nagaland nung tesayur kwiar memetet, shingaia tanurtem school kidang jara mali, tsüngbang mali aser kilem tapok kübok amenba mangu, shingaia tsüraburtem tanurtem fee magütsüteti maksü aiben ajurua pei tanurtem private school-i yokba timtem mereprangteti Nagaland nung government school-tem ka ken, ka ken ta laoa tenzükba joko telaomar. Iba tia nung kaketshisatsü junga mengutet lanurtem mapa mangu kangshir. Aji oda, shiri Nagaland nung government school laotsüsa tesayur mashimashi transfer yok, shiri tesayur mashimashi shim aser shiri Naga nunger tanurtem nem kaketshisatsü tajung agütsütsü asoshi yokba sen chitsü, parnoki atom bomb ajungoktsüba dang nungi tamajungba Naga lima raksatsüogo ta bilemang. Ibaji tesasatsüka lir. Ajisüaka, laoa alidang mesotsü aser raksar alidang yanglushitsübaji kodang temenu masü, tanü ya yanglushitsüba mapang shitak aser tetemsü anogo ka lir. Joko, kaketreju aser kaketshisatsü agi pei kija ajangzüktsü shingaia tebilem saka ibai teti atema ajak ajangzüktsüba mapa ta bilema inyakdi.