Kin pongo kaketshirtemi SARDP atema angh dangi zülu

 Anogo 30 tsüngda mapa tenzüktsü akanger

Kohima, Jul 16 (TYO) : Nagaland nung 2010 küm Special Accelerated Road Development Project (SARDP) kübok gari ana süitepteta lenmang sademsadema yanglutsü asoshi lenmang yanglur contractor telok ka tenüng agi M/S Maytas & Gayatri (JV) nem agütsü, saka inyaktur yutsüba agi nübortem kanga timdagi.
Iba teloki yanglutsü agizükba lenmangtemji Mon-Tamlu-Merangkong; Longleng-Changtongya; Phek-Pfutsero; aser Chakabama-Zunheboto liasü. Lenmang tasazük ajak agi kilometer 329 lir.
Item lenmangtem jagi district pongo nung amshir aser item district nung aliba Naga kinten kaketshir telongjem pongo longjemer tanü Honibar nü Nagaland angh nem item lenmangtemji tanü nungi zünga anogo 30 tsüngda tenzüka inyaktsüla ta takangba ka agütsüogo.
Nagaland angh nem lenmang yanglutsü asoshi takangba agütsür kin pongsanger kaketshirtemji Ao, Sumi, Konyak, Chakhesang aser Phom nungertem liasü.
Naga nunger ama tenem nung aliba kintem atemabo senzüsenpongtsübaji gari lenmang dang lir, anungji gari lenmang majungbaji timtem tulu, iba jagi nübortem kanga akoksadaktsür ta parnokisa ashi.
“Mapang talangka senzüka toktsüba sülen tangbo center sorkari Nagaland-a anepalu tenzüker südi ta bilema liasü, ajisüaka mapa tenzükli 2012 kümbo lenmang yangluba mapatemji anenadok, kechiyong contractor-tem nem mapa inyakba sen magütsü aser mapa nung sen tutsütsü nüngdakbatema meinyaktsü,” ta kaketshir lenirtemisa ashi.
Item lenmangtem inyak tenzükdang ali tasen tuzükba agi gari lenmang tilaka nungbo jajaya liasüba ajak nembanga adok aser lenmang yanglurtemi yamaji ser yutsüba agi tangbo gari senzüa mejungi kümogo, iba jagi timtem marem mapang mapang shia nübortemi nübotsüka lenmangtemji yanglushir ta ta parnokisa metetdaktsü.
Joko, tanga teinyaktsü lenmang kecha mali akümba agi, nübortemi Gauhati High Court nung ken o (PIL) agütsü aser iba ken o ji angadanger külen yaküm 2015 küm October 13 nü obendangdak nungi iba mapa ya ita 18 tsüngda renemtsü obendang agütsü. Ano, kasa obendangdak nungisa item lenmangtem inyaker nem magütsüi aliba sen ita ka tsüngda agütsütsüla aser contractor-ia hopta ka tsüngda mapa tenzüktsü asoshi obendang agütsü, ajisüaka okadak nungi obendang agütsüba ama shingaia meinyak, anungji lenmangbo tangsa tamajungba kümogo ta kaketshirtemi angh dangi züluba shidi nung metetdakja lir.
Kaketshirtemisa ashiba agi, SARDO kübok inyakba lenmangtem tanga Northeast state-tem nungbo renemogo aser center sorkari contractor-tem nem mapa inyakba dang masü saka jenjang atutsü asüngdangba ajak agizüka tutsüogo aser sena ajak agütsüogo, saka Nagalandbo senzüka dang toktsür ta kaketshir telongjemtemisa metetdaktsü.
Anungji, tang Nagaland nunga inyaktur aliba lenmangtem ya anogo 30 nü tsüngda tenzüka meinyakdaktsüra, onoki tapet mapa inyaktsü aser iba atemaji onok khuret masütsü ta metetdaktsüogo.