Kin sasep nung longjemba ajanga Naga loktiliba nung yimjung alitsü

Dimapur, April 8 (TYO): Naga loktiliba nung yimjung alitsü atema pei pei kin sasep nung telongjem akangshitsüla aser angatetteptsüla ta Municipal Affairs Parliamentary Secretary, R Tohanba-i tanü ashi.
Yimchungrü Union Kohima (YUK) 22 buba Lokti Senden amendang Tohanba-i, “Naga nunger ama asenoki kidang nungi telongjem aser tangatettep adokdaktsütsüla aser ibaji asen kin sasep nungi tenzüktsüla” ta ayongzük.
Naga nungeri taintem akhümtsübuba yimya sübatsüla aser tatok agütsüba aser amadokba tangatetba nung ammettsüla. Asenoki lanuputu dang yimya tajung sayutsüla, ta paisa shisem.
Parliamentary Secretary-isa telok tali akangshitsü atema lennirtemi pei telok nung aliba züngsemtem indang tebilemba aser yimyatem angatettsü merangtsüla ta senden nung adenertem ayongzüka jembi.
Tanü senden nung Block Development Officer (BDO) Chessore, S. Lakiumong-ia tajungshi o jembidang, Union nung lennirtem tali ajemalutsü aser taremzük lia telok aser kin tejakleni aotsü atema mapa inyaktsü ashi.
Senden nung YUK President, T. Kejingkhum-i tesentepertem pela agizük, Yimchungrü Women Organisation Kohima Unit aser Yimchungrü Students Union Kohima-i ken ajanga shilem agi, General Secretary T. Kiutsuthong Phuvrü, Finance Secretary K. Lato Zhimkiur aser Statistical Secretary T. Lokhum nungertemi i 2015-17 report tem metetdaktsü.
Senden nung Associate Pastor (Women) Yimchungrü Baptist Church Kohima-i temoatsü meshia sarasadem aser Church Secretary Vongsuthong-i tenüngsang agüja tembang.
2017-19 kümsük atema Yimchungrü Union Kohima (YUK) ketdangpurtem shim.
President – T. Kejingkhum, Vice President – A. Ariba Huker, General Secretary – T. Akhumba Zanger, Assistant General Secretary – T. Kiusangthong Phuvkiu, Finance Secretary – K. Lato Zhimkiur, Press & Information Secretary – Johan Kiutsukiur, Statistical Secretary – H. David Hutanger, Art & Culture Secretary – T. Pusukhong and Treasurer – A. Akum Huker.