Kin teloktem aser ali kiburtemi sorkar den yariteptsüla: T.R Zeliang

Kohima, October 10 (TYO): Kin teloktem aser ali kiburtemi sorkar den yaritepra aser terenlok atema inyakba nung shilem agira Nagaland nung temelenshi arutsü, ta tanü Nagaland Chief Minister T R Zeliang-i ashi.
“Asenoki terenlok atema amalitepa külemi inyakdi aser bendanga agütsüshidi” ta State Banquet Hall nung Road Connectivity indang sentong nung jembidang T.R Zeliang-i ashi.
“State sorkari tashishitsü melii inyaktsü atema mapa inyakdar aser iba atema telatetba kar yanglutsü. Sorkari lenmang aser tongtepratepba, temang anepalubaren, shisaliok wadang aser infrastructure tsütsü renloktsü atema mapa inyakdar” ta paisa shisem.
Sorkari nendaka agizükba aser nangzükba ama chief minister-i ‘Committee on Roads’ ka tentettsü tebilemba shidang. Iba luden jagi bangdak department den külemi lenmang aser connectivity indang maparen inyaksangshitsü, ta TR Zeliang-isa ashi.
“State anguba sülen ochimashi mapa inyaka aruba ya yimya ka ama kümog. Ajisüaka, sensotemi tangatetba melenshiba aser onok pusema nungitba ajanga onoki tashishitsü melii mapa inyaka aotsü nangzüker” ta paisa metetdaktsü.
“Vision document nung aliba ama concept papers aser DPR yanglutsübaji sorkar indang tebilemtsü aser külen nübortem mesüra ali kiburtemi project pusema inyaktsüla. Nenoki DPR nung aliba ama mapaji inyaker asü masü ta asüba den department o contractor tsüngda lemtetba ama mapang shitak nung project tembanga inyaker asü masü ta reprangtsüla” ta chief minister-isa ashi.
Two-lane aser single lane atemabo ali melena temenok agütsütsü lateta mali saka four lane atema dang temenok agütsür. Anungji, public aser ali kiburtemi ali atema temenok meshira, two-lane aser single lane road project tem mapa küma meinyakteti anentsü, ta paisa shisem.
District headquarters ajak two-lane road ajanga sendakteptsü mulunga agizükogo. Iba mapa nung nija kiojen amala kongshira, state sorkari lateta aliba ama temenok agütsütsü, ta TR Zeliang-isa metetdaktsü.
Maytas and Gayatri-i district pezü nung SARDP first phase mapa tom nung toktsüba atema chief minister-isa ashiba agi, “Supreme Court-i oshidang agütsüba nung Joint Venture ajanga inyakba mapa asoshi sorkari sen menoktsü aser meinyaki aliba mapatem asoshi re-tender asütsü aser contract tasen agütsütsü.”
Centre sorkari senotsü lemzüktsütsü nangzükogo aser taküm November-December tsüngda DPR den tender mapa inyaktsü. District tem nung Deputy Commissioner temi ashishitep melira clearance certificate agütsütsüla, ta chief minister-isa ashi.
Sentong nung PWD (National Highways) Minister, G Kaito Aye-i o jembidang, “tang Nagaland nung NHs kübok lenmang 11 lir aser itemji kilometer 1546 shi lir. Ano NHs 6 agizükogo aser itemji kilometer 765 shi asütsü” ta metetdaktsü.
District headquarters ajak sendaktepba den international trade centers asem- Longwa (Mon), Pangsha (Tuensang) aser Avangkhu (Phek) sendaktepba lenmangtem atema consultant ka shimogo aser DPRs mapa teinyakdak lir, ta Kaito Aye-isa ashi.
Lenmang tasentemji – NH-29 – 2.7 kms, Tseminyu-Zunheboto-Aghunato-Shamator-Noklak-Pangsha – 200 kms, Trans Eastern Highway Mon nungi-Longwa-Pangsha-Kiphire-Avangkhu – 280 kms, Gandhi Ashram Chuchuyimlang NH-2 nungi Pangsha (ITC) – 167 kms, Maibung (Tening) nungi Tamai (Manipur) adena Talenglong tashi- 75 kms aser Sinulagari-Bihubar (Assam) nungi Mon (Nagaland) – 71 kms.
PWD (Roads and Bridges) Minister, Dr Neikiesalie Nicky Kire-ia o jembidang ashiba agi, State Highway, Major District Road, Other District Road aser Village Road ta ajaba lenmangtem tasazükji kilometer 12,079 shi lir.
Maneni, RCC, Bailey, aser Steel Girder aputem 173 lir, ta Dr Nicky-isa shisem.
Tang Nagaland nung lenmangtem tia mejungi lir saka PWD (R&B)-i project balala inyakdar. Küm shia lenmang aser aputem anepalutsü atema sen crore 300 nüngdaker. Gari lenmang anepalutsü atema tongti süa bilemba agi department-i “Nagaland Road Maintenance Policy” yanglu aser state sorkar dangi benogo, ta paisa ashi.
Sentong nung Chief Secretary, Pankaj Kumar-ia ashiba agi, lenmang yangluba ya tebenja mapa ka lir kechiyong iba nung sorkar, mapa inyakertem, ali kiburtem aser tangartem aika sendaktepa lir.
Lenmang yangluba mapa takok ngua inyaktsü atema public aser sendaktepa alirtem ajaki yariteptsüla, ta Pankaj Kumar-isa shisem.