Kin tuluba

Nagaland nung Municipal aser town council election junga magitettsüsa akümba ya ajak asoshi tesasatsüka lir. Town Committee dang asüba jenjang nungi municipal aser town council-bo aküm saka election magiteti aruba yagi asenok ano yimten nung junga mainba tia ka sayur. Committee asüba nungi council akümbaji tsürabur nem dang mesüdakja aliba jenjang nungi peisasa pei anepalutsü asoshi kibong akümba amai lir. Aji oda, council jagi pei yimti asoshi nüngdakba terenlok mapa ajak repranga inyaktsü. Atangji, government-ia yaritsü saka government teyari medenia peisasa pei yimti atema nüngdakba ajak repranga anepalutettsüsa council dak tashi alitsüla. Iba jagi yimti nung alirtem dang nungi alimelen agitsüsa akümer. Joko, maparen aika nung government yabo temzüng ozüng yanglutsür aser lenmang sayur ka dang akümer saka shitakba teinyakertembo nübortem lir, anungji nübortemi peisasa tenlatepa terenlok mapa inyaker. Ibaji arogo nungertemi pei arogo nem tenla agütsüba amai lir. Atangji, yimteni alimelen talitapong sarutsübajia tim masü, anungji nübortemi pei asoshi agütsür ta angateta mulungsua agütsütsüsa saru ajak timi latettsüla. Tangbo, nübortemi saru agütsütsü memulungba agi Municipal act nung alimelen sarutsü indang lateta aliba arrla agienogo, ajisüaka iba jagi council tashi maittsü, anungji tim saru kabosa sarutsüsa inyakyim nung alitsüla. Tanabuba tebilemtsüji tetsürtem nem menden 33% shiteta yutsüba atema teburtemi municipal aser town council election magidaktsütsü nokdangba ya asütsü. Shitakba agibo tetsür tebur kecha mali, pei lima aser nübortem asoshi bendanga inyaktsütsü pur tetemsü nisung shimtetra iba jagi alima ajungtsü. Ajisüaka, alima majungba agi tetsürtemi Nagaland nung yimten nung shilem magitetter asünungji, parnokji yimten maparen nung anitettsü asoshi parnok atema 33% shiteta yutsü. Ibaji Naga tsürtem asoshi Nagaland nung yimten nung shilem agitsü tenzüker süla saka teburtemi tentetba lokti tentet aikati memulunger asünungji, iba telemtetba ozüng ya mapa küma inyaktsü asoshi tasak ka kümogo. Iba tebilemtsü onük nung ya kechisüdir süaka ajaki agizüktettsüsa telatetba ka agitsüla. Iba tashiji mapang tatsüka atema election maparen ya ken soita atatsüla. Atangji, Nagaland nung municipal aser town council election agitsü tim asünungji state government-ibo 1^st February nung agitsü metetdakja lir. Ajisüaka, Nagaland nung lokti tentet tetsüdi ajaki nokdanger asünungji ken mapang tatsüka atema iba election maparen ya anena atatsüla. Atangji, yimten telok kari kechisüdir süaka election agitsü ta ser nomination paper file sütettsüa akok, mesüra ano telok karibo kechisüdirsüaka magidaktsütsü ta office tashi orr nokdangtettsüa akok. Ajisüaka, pei kini nung ta shitakmonga ma ta ser nomination file asübaji pei kin aküm mapayuba mapa ka asütsü. Ano, külen lokti tentettemi telemtetba tajung aser takang ka ajaki tashi angatsüsa metetdaktsütsüba dak alaka tashiyim agi nokdangba nung topur majung ka adoker. Koba mapa nung südir süaka, pei dang nungibo pei kin aser pei lima tama asütsüla. Pei kinji pei adenba political party dang nungi temaba aser tongtibangba ta züngshitsüla. Aji oda, külen pei kini alimai meteta maparen  kar nung liromedemtsü sangdonger saka asenoki pei kin den medeni jokteta aor ta süra iba jagi asen kin dang masü saka asen dena tangar tsüngdang akhüm samar. Urban Bodies Election ya agitsüla saka tang amai pei-i kin külen aser asen külen ta ser mangatettep madoktsüsa tamasa tangatetep kari arumatsüla. Aji oda, tang tashi nung nisung kwinangkati tesem kongsa nomination agüja ali item ajakji meyipa agitsüla aser memenuisa mapang tajung ka nung election agitsü asoshi sentong renemtsüla. Asenbo takoksa angutsüa akok saka kechi mapa mung südir süaka, teti asen dang nungibo pei kin tama aser temaba südaktsütsüla. Iba jagi asenang ajangzüktsü.