Kinü mezüng scü ajanga parnok IQ meteter

Washington, July 14 (Agencies): Kinütem-i mezüng kozüba scü ajanga doctor temi parnok tarutsü IQ meteter, ta bushisüngdang tasen ka ajanga ngutetogo.

Case Western Reserve University nungi bushisüngdangertemi ashiba agi, tetsü ka mashisa alidang yi ajemba dak ajemdaker, kinü ka meyong mezüng scü nung, fatty acid ethyl esters (FAEE) aliba ajanga, tanurji tarutsü nung IQ tebilemtsü lir maliar shiteter.

“Onoki FAEE aser parnok IQ na tesendaktep lir maliar metettsü merangdangdang, bilemba ama ana ya tesendaktep lir,” ta Jack, Joseph & Morton Mandel School of Applied Social Sciences nung assistant professor aser iba bushisüngdang nung lenir, Meeyoung O Min-i ashi.

“FAEE ajanga tanur zülung asüdang yi den tesendaktep aser aienba mapang tebilemtsütem metetdaktsür,” ta Min-i ashi.

Tsürabur yi ajemba mesüra majembaji tanur asodang nungi jangjaba ajanga tanur nem mezüng yongi teyari shitak agütsüteter, ta Min-isa ashi.

Iba bushisüngdang ya ‘Newborn’ project nung ajemdaker agiba lir. Iba project atema, tetsü kati mashisa alidang cocaine, yi aser tanga drugs amshiba tanur ka temang aser shisatsü aienba bushisüngdangba telok, ‘US National Institutes of Health’s National Institute on Drug Abuse’ ajanga sen-o-tzü nung yarir.

Project Newborn ya ajanga tanur 400 shi dak küm 20 tashi iba bushisüngdang agia liasü.

FAEE tendangba ajanga ngutetba ama tanur 216 bo shitak atalok, ta bushisüngdang ajanga nguteta liasü.

Parnoki tanur arishi küm 9, 11 aser 15 tsüngda alirtem tatidang kar agüja liasü. Tasodang FAEE jenjang tali alirtem dak IQ ajema alir, ta iba bushisüngdang ajanga nguteta liasü.

“Asenoki tetsü ka mashisa alidang yi ajemba ajanga kinü meyong IQ nung timtem agütsür, ta meteta liaka ibaji kara putettsü asoshi FAEE tendangba maliasü,” ta Min-i ashi.