Kinük Ola

~   Mrs. Lemdenla, Aoyim Dimapur.

Küm aika Tir Yimyim zünga arudang olemsapang aser yimobilem osettem azüngdang kanga temoatsü ngua jangratema azünger. Tezülur ajak dang kanga pelar-a.
Tsüa!! Ozü nebura tangateter temeteter aser tasü ita nüngsen aremera lir ser nung ani, saka samanerang mali asü na ta kanga sasa-a azünger.
Mezüngbuba nung lemang majungba indang jembeyonga asen indang dang masü kin ajak maksü. Tzü aser light majungba indang jimbiyonga ajia kin ajak maksü. Paper Mill, Sugar Mill shibangbajia kin ajak maksü asen kija masü, saka asen aor kija meyong maksü ama bilembaji kati ka lotsütepa ya, tangar alima kanga dang aretepa alima shisatsü nunga tanüla nunga tejakleni asemtepdang asenok aorbo ano spellingiang aser ojang rateteang meyipa lushi.
Ita anogo züng ano mejangjar aser mebendangteter, asenoki item yabo pei agitsü yari Class I aser II nung angazüker amai bilemer. Amongtsümong küm shia Moatsümong ratet Tsüngremmong ratet nisung balalai ratet jembiaka ano meni Hornbill ang aküm. Ano meni Hornbill ratet jembidang küm kwi agijar memetet. Ano asen aor rongnung alima ajungai meteta nüngtoko nisung asayar tajung ka atok nung pa sür küm aika lirang mapa tajung ka pa tenüng nung inyaktsü lemtet nung ajia oda tangar kima-ang oa yanglutsü jembir amai angashia kanga sasa-a bilemer.
Ashirakoshi asenok aora tangar dak alaka tashitemetetera aiak lirto. Anungji asenoka tangar nem dang manishidaktsüi tangar jakdang asenok asütsü merangtsüla.
Asenok o asenok na longjemra asenoka jungküm, saka asenok o asenok dang aitsütepa abotsü koyatsü ta kazütepra tangar memenepa dang masü tangar menüdang akümtsü aser tangar majetsü. Tamangba nunga aori sayuteterto talanga oadoker alima shisatsü nunga aori sayuteterto asenoki memeneper parnokiang asenok sayuti asür. Anungji asenok o asenok na ita anogo, spelling ya dang melenshitepa makazüi yangi mapang ojang endoker kati ka dang müma temeim agi metongshitepa takokeri tamaoker dang miema yaritepa alitsü merangti.
Asenok o asenok na ita anogo shtiak meshitak metetsü alima o bendanger pushitepdang ajongbena asen Tsüngremi o bendangra asenok asoshi tesasatsü asütsü ta kinük nungi shitanger saka osangtem azüngdang temoatsü angur temolung ayangtsü aser temolung atangsüa aika züngshidang tezülurtem dang kanga pelasater.
Anungji tanü nung tajung inyaktetdang tenüngsang agütsüti, metokmeperi inyoksemdang temeim agi metongshitepa tangar kin ama meimtepa putepa alitsü merangtepi ni ta ayongzüker metokmeperi zülusema lira tezülur nem tatok agüjangma.