Kinüngboi pei kinungtsü tekolak atang

Vijayawada (AP), Luroi/August 12, 2019 (Agencies): Andhra Pradesh state kübok Vijayawada yimti nung nisung kati pei kinungtsü tekolak tangzüka yok aser pai la kolakji bener yimdong süa senzü, ta Deobarnü police-i ashi.
Iba taoksatsü lendong ya Satyanarayanapuram police station kübok Srinagar colony nung ataloka liasü.
Police-i ashiba agi, Pradeep Kumar-i par ki anasa pa kinungtsü Manikranti (23) dak kotari kati terok nung arang. Iba sülen, pai la kolak tangzüka yok aser teka külen la kolak aser teka ka nung kotariji amer yimdong nung senzüa angu.
Yimdong nung Kümar-i inyakba ngua nüburtem tetsübu agi jenshia aoba indang CCTVs video ajanga sayua liasü.
Kumar-i pa kingutsü kolakji ana-meta ayong ka nung endok aser pai pasa Satyanarayanapuram police station nung bendanga agütsü.
Kumar-i indokba tekolakji tebushidak lir, ta osangbener dang Deputy Commissioner of Police, Vijay Rao-i, ashi. Autopsy atema Kumar kinungtsü tasümang ya sorkar hospital ka nung bener oa yutsüogo, ta Vijay-i shisem.
Küm pongu tejakdang Pradeep aser Manikranti na kati ka meima kibong aküm. Ajisüaka, mapang shia apuani ana tsüngda mangatettep adoka rarabangsen adoka liasü, ta police-i ashi.