Kinungtsü shilem

Barack Obama US tir menden January 20 nü toktsütsü lia pai Chicago nung America nungertem den US tir ka ama tepila o jembidang, America nunger democratic yimten aser tarutsü indang ken o lemsatepba den pai pa kinungtsü  Michelle aser par jala ana nem tenüngsang agüja jembiba o nung ajak temoatsü angutsüsa o tajung keta lir. “Na ya kü kinungtsü dang masü aser ozü jala ana tetsü dang masü saka kü tembar tajungtiba liasü. Nai nü nem menungloktsüba khuret dena aben aser ibaji ajemalua temulungtetba tulu nung pelashishia dang inyak aser US tir ki, White house ya nisung ajak meyong ama kümdaktsü,” ta Obamai pa kinungtsü dang yimjak manung ashiba jagi la nük nungi dang masü saka lar jala nük nungi dena nüktsü aludaktsü. Atangji, iba ama o tajung kinungbo bang nungi adokbaji angashia kinungtsü kati tepela agi pei nük nungi nüktzü soita meyutettsü. Barack Obamai iba ama temeim o tajungji pa kinungtsü asüpila sentep nung ashitsü anünga mayu. Ashiko, asenok ka asübo, iba ama ken o tajungjibo akümli nung kinungtsü, mesüra kinungbu dang ashitsü mebilemtetla. Asenok taküm ya bilemdangra, anogo shia kinungtsü jashidaktsür mesüra kinungbo tezüdangdaktsür, saka asüpila sentep nungang jepa tenüngsang o tajung ashir. Asenoki akümli nung inyakba mapatem rongnung amajok mapa kaji asüpila sentep nung asür nüng sanga jembiba ya ka asütsü. Atangji, nisunger yimya aser sobaliba nung tasür indang tamajung jembitsü masüji tajung dang jembir menungraseta pilar. Ajisüaka, tang Obamai pa kinungtsü yimjak nung asangba amai asenokia tangar tsüngdang pei apuani nüng sangtetra aser sangtettsüsa litetra, kibong ka tashi angudak lenmangji aji asütsü. Atangji, kinungtsü karibo pei kinungbo den medemer ama bilema yimten aser lokti khuret lemsateptsü melen jashidakja mesüra tezüdangdakja dang alitsüa akok. Mesüra kinungtsü karibo pei kinungbo ita sen mesüra taa agi tenük masüng nemnema alitsüa akok. Ashiko, kinungtsü karibo pei kinungbo dang rongsen aginü dang ochimashi mapa inyaktsü ajungshia alitsüa akok. Ano, kinungtsü karibo pei kidangi pei kinungbo medemer aser kinungertem shinga marudaktsünüi alitsüa akok. Iba ama jakla tamajungji asenok dak keta lira, tanü Obamai pa kinungtsü dang ashiba o jagi asenok tangatetba tajung kati arudaktsüdi. Atangji, tebur aikati tetsür mezüngmeshir aser kilir ama amshir, ajisüaka kinungboi kinungtsüji medemer ama meimtsüla aser chubatsür ama akümtsübutsüla. Iba kasaji kinungtsüia pei kinungboji medemer ama aser chuba ka ama akümtsübua amshira, kibong khuret tulu aliyonga melamelaa koktettsü aser yimten aser lokti khureta pelashishia dang bentettsü. Aji oda, Michell-i US tir ki, White house, nisung ajak meyong ki ama kümdaktsü ama, pei kinungbo koba jenjang nung lidir liaka, pei aliba kiji ajak atema Tsüngremi moatsüba ki ta bilema, taruner ajak arua anisüngzük aser tepela anguba tesem ka kümdaktsütsü tim. Ashiko, asen lima nungbo tulur aser takar ki kar nungbo kinungboi masü kinungtsüiang kishi tuluba shibanga yur, tangar shinga kiküm alema maidaktsüi pei ket nung tashi aliba mapang süidaktsür asütsüa akok. Ajisüaka, kinungtsütemi metettsüba kaji, pei kinungbo koba jenjang nung lidir liaka tangar den tesendaktep tajung yanglutsübaji kinungtsü dak tulu keta lir. Aji oda, tangar den tesendaktep junga lira kinungbo khuret maparen aisü nung pongpapongpaa kümdaktsür. Iba tangatetba nung Michelle-i par alidak White house ajak meyong kümdaktsüba ama, asen tantsür tambur kümer mesüra sür külena akümlirtemi menungratsüsa asen aliba kidangibo ajak arutettsüsa aser ajak anisüngzüktettsüsa kinungtsüi akok tashi shilem agia nisungtem den putepa alitsüla. Atangji, Obamai ashiba ama, Michelle ya shisataka, teinyaknü, tejungnü aser taremzük tetsür ka lir. Shiba südir süang, teyimla mesamadaktsüi Tsüngrem dak amanga  meranga inyakra, tanak temesüng kecha mali pei inyakba nung takok angutsü, oda US tir tashia kümtettsü ta Michelle-i ashibaji, par agi athishia tatishitsü tajung agi tanü lanurtem ayongzükba ken o lir. Ibaji asenok ajak asoshia tagitsü ken o südaktsüdi.