Kiphere DPDB senden menogo

Dimapur, Luchii/December 9 (TYO): Ita shia amenba Kiphire DPDB senden December 9 nü conference hall Kiphire nung Minister, Soil and Water Conservations, Geology & Mining, V.Kashiho Sangtam lenisüba kübok menogo. Senden nung tawa shimba MLA Yangseo-a dena liasü.
MLA T.Yangseo Sangtam pelashishia agizükba den Minister-i, office tekolaktem ajak tamakok maludaktsüi DPDB senden nung adenba atema pelaba lemsatep. Paisa, DPDB züngsem ajak dang tarutsü nunga bendanga agüja meranga inyaktsü ajungshi.
Kasa mapang nung MLA T.Yangseo Sangtam-i, tawa agiba bye-election nung Kiphire nung alirtemi pa shimba atema pelaba lemsatep aser District ajungkettsü atema inyaktsü tenangzükba agütsü. LADP schemes indang sensaksemba mapang pai Contractor ajak dang fund mashiyim nung mamshitsü, saka health aser education sector dak talisa rangloker nüburtem aser district ajangzüktsü atema shisa kaa amshitsü mepeshi.
Senden nungsa Deputy Commissioner Kiphire, Ajit Kumar Ranjan IAS-i, office tekolak ajak dang, taruba küm nungi online attendance management system amenokba sülen office tekolak ajak training tem nung tamakok maludaktsüi arua adentsüla, ta metetdaktsü. Paisa, attendance kanga sashia agitsü ta shia ketdangsür ajak dang pei mapa tali temulung agüja inyaktsü aser mapang shidak amshitsü mepeshi.
Senden nung LADP schemes aser Pungro-Kiphire indang projects 2020- 21 aser Seyochung HQ nung SBI branch ka amenoktsü atema benoka jembi.