Kiphere nung DPDB senden menogo

Dimapur, June 08 (TYO): June 07, 2017 nü Kiphire District Planning & Development Board (DPDB) senden Deputy Commissioner Conference Hall, Kiphire nung menogo.
Iba senden nung mendenbuba Deputy Commissioner aser Vice Chairman DPDB Kiphire, Sedevikho Khro-i board züngsem tasen- Meyazungba Jamir, EAC Seyochung metetpelaja liasü.
Tesüiba senden onüktem reprangshiba sülen Board züngsemtemi District Hospital Management Society registration atema o lemtep, ajisüaka Registrar of Societies-i nüngdakba formats magütsüba ajanga department dang formats den iba atemaji fees agütsütsü tuyu.
Administration-i Board dang, GA rest house temalen aliba Lukhami Road tzünglu ajanga ponger aotsüsa lir, kechiyong kilentzü aodak junga yanglua mali, ta metetdaktsü.
Iba dak sendakba nung Road & Bridges department dang iba atemaji nüngdakba mapatem inyaktsü mepishi.
Senden nungsa, Government Higher Secondary School Kiphire den tzü pipes sendakteptsüogo anungji tekaratiba nung school nem tzü supply agütsütsü atema Public Health Engineering Department dang mepishi.
Chairman-isa Board dang, tan ita tsüngda Centre nungi Minister kati Krishi Vikas Kandra semzüktsütsüa akok, anungji iba sentong nung Board züngsem ajak medema arua adentsü atema mepishia metetdaktsü.