Kiphire aser Pungro tesemi nüngdakba osettem bener aotsü merangdar

Shamator nungi Kiphire tsüngda NH 202 nung Wapher yim aser Shamator jila tsüngda lenmang anentsüh agi Luroi/August 02, 2018 nü anenzüka orr aliba noksa nung angur.

Dimapur, Luroi/August 2 (TYO): Nagaland sorkari Kiphire aser Pungro tesemi petroleum products densema tenüngdakba oset balala bener aotsü asoshi takokba tashi inyakdar, kechiyong iba tesemi Meluri aser Tuensang len nungi aoba lenmang anaprongla anentsüh aluba aser lenmang ataoka aiba ajanga nokdangogo. Kiphire, district administration ketdangsertemi ashiba agi, anogo ananü dang peritsüsa chiyongtsü rizünga lir aser district administration-i chiyongtsü aser petroleum product tem yokyatsüyaba ajak achaayangdar.
Home department aser Central Ministry of Home Affairs nati tayimtsü ajanga item tesemtemi tenüngdakba osettem bener aotsü atema longjemogo, saka tsüngsang majungba ajanga iba maparen minyakteti anendaka lir. Maneni Food & Civil Supplies Department-i chiyongtsütem ajak tayimtsü kodang otetdir idangji bener aotsü atema renema lir.
Kasa mapang nung Kiphire aser Meluri nungi district administration ketdangsertem lenmang ataoka ir aliba tesem nung munga lir aser temulungertem teyari agi tesem anaprongla len khen atema transit camps yanglur lir. Ali anenoka ir aliba tesem adena tetsüng agi tenüngdakba osettsüttem belendar aser idak nungjiagi tata gari ajanga Kiphire-i osettem belener aoer.

Osang ajanga ashiba agi, khu abenba tata gari karbo Meluri nung anena lir aser totzü abenba garitem dobashi lenisüba kübok Mao gate len nungi Meluri-i apusoa ogo. Tenüngdakba osettsüttem yakta Meluri atongtsü imlar.
Association of Off-Road Nagaland nungi Volunteer tem Lorui/Aug 2 anepdang Kohima nungi Meluri-i ogo. Parnoki petrol/diesel aser khu balala belenba nung teyari agütsütsü. Ketdangser aser volunteer temi off roaders tema yaritsü aser len sayutsü asoshi renema lir.
Temulungertemi teyari balala agütsüba den lenmang takaratiba nung yanglushitsü asoshi state ajunga nung tang tinyakdak lir. Anentsüh alur aliba tesem ajak nung temulungertem densema machineries aser ketdangser taliba tashi ajak anioka mapa inyakdar.
IG Assam Rifles puri lenmang merekba nung amshitsü atema parnok indang JCB ana aser bulldozer aputsüogo. Sorkar kübok department balala indang tata gari aser excavator tem ajak amshia maparentem inyakdar aser kasa mapang nung iba amala lendong achaayangtsü asoshi NPWD pur apusogo, ta ketdangser sangdong ka ajanga metetdaktsü.