Kiphire aser Zunheboto nung Teniemie Church telongjem sentong agi

Dimapur, Monupii 21 (TYO): Monupii/May 20, 2018 nü Zunheboto Town Teniemie Church ajanga sentong ka ayongzüka Kiphire Town Teniemie Church semdanga liasü.
Iba sentong nung jembiba mapang, “Mapa tasen bener arutsü aser tesüngmangtsü maongkatem bener arutsü asoshi kotak nung aliba tebu Tsüngrem nem mezüng tenüngsang agüja tenzüktsüla,” ta Zunheboto Town Teniemie Pastor-i ashi. Paisa iba sentong nung adenertem dang Tsüngrem dak tamang akatsü ajungshi aser Pai nisung meimchirtem meimba ya tatem maka, ta ashi.
Zunheboto Town Teniemie Pastor-i Kiphire Town Teniemie arogo nung züngsemtem dang mapa tali inyaktsü aliba nung takok angutsü asoshi tejakleni mera tasen awaloka oa inyaktsü ajungshi.
“District balala nung sorkar mapa inyaktsü ya maongka lir aser item tesemtem nung tebang o agi kisüng masü saka mapa agi Yisu Khrista sentsüwangshi asoshi inyakba taküm kaka asütsüla,” ta paisa ashi.
Tsüngremer wadang nung nokdaktsü tejangraba lira kidang aser bendanglinük nung tesem aika asen jakdang lir, ta paisa shisem.
Nagaland nung aliba district ajunga nung Tsüngremer wadang tuluba kümdaktsütsü nükjidong nung pastor-i anir Kiphire Town Teniemie Church nungi züngsem trok Zunheboto Town Teniemie Church semdanga liasü.