Kiphire DC den tepila sentong agi

Dimapur, Rongjui/September 4 (TYO): Kiphire District Administration-i achaayanga Deputy Commissioner Kiphire, M. Shayung Phom den September 4 nü tepila sentong agiogo. Iba sentong ya DC Office Conference Hall nung agia liasü.
DC M. Shayung Phom-i o jembidang ashiba agi, kin asem lokti tentet teyari nung pai takok karbo ajangtetogo. Paisa, sentepa aliba lokti dang district ajungkettsü mechi taruba DC bendanga agüja nongita yaritsü ajungshiba den kin asem lokti tentet dang district ajungkettsü atema longjemer inyaktsü ajungshi.
District officer tem rongnungi ADC Kiphire Hq. Reny Wilfred, IAS; ADC Seyochung, Japheth Woch, ADC Pungro, Zakabo V. Rotokha, Helen Jamir, Principal Zisaji Presidency College Kiphire aser Additional SP Kiphire, Tshurhosie Kajiri nungeri tepila o jembia liasü.
Officer temi o jembiba mapang DC, M.Shayung Phom ya ketdangser tajung ka lir shiba mapa ajak liromedema achayangteter ta ashi. Parnokisa, DC lenisüba kübok district temoatsüma nung aruogo aser pa tangatetba tajung aliba ajanga pa lenisüba kübok Tribal Hoho, kaketshir loktitentet aser NGO tem den tesendaktep tajung yangluogo, ta ashi.
Maneni pa lenisüba kübok district temzüng ozüng tsütsü tensa tajungba kümogo ta ashiba den Kiphire district-i pa taruba mpang takok nung aotsü imlaa ataba metetdaktsü.
Kiphire kübok United Sangtam Likhum Pumji (USLP) Eastern Sumi Hoho (ESH) aser Yimchunger Tribal Council (YTC)-i pa nem sempet balala agütsüba den pelaba lemsatep.
DC den tepila sentong ya Sangpangchang EAC lenisüba kübok agi, ta DPRO Kiphire sangdong ka ajanga metetdaktsü.