Kiphire district nung yipru ait

Dimapur, Monupii/May 14 (TYO): Nagaland kübok tesem balala nung Hombar nikongtsütsü yipru tesashi aita teraksatsüba bener arutsüogo.
State kübok yipru agi kongshiba district tem rongnung Kiphire District nunga kanga mejungi kongshiogo. Yipru ajanga DPRO Office Kiphire building dena kilem aser ki aika aponger aoba den power supply daka kongshia liasü. Kiphire district kübok aliba nüburtemi power supply yakta yanglushitsü imlaa atar.
Yashi yipru lendong nung nisung ana terara yirua district hospital-i temang anepalutsü atema anirogo. Yipur aser tzünglu kanga sashia aruba ajanga kio-jen raksatsüba dak alaka nisung asüba osangbo kecha mali, ta DPRO Kiphire sangdong ka ajanga metetdaktsü.