Kiphire DPDB senden amen

Kiphire, Aenjeti/January 13 (TYO): Ita shia amenba Kiphire District Planning & Development Board (DPDB) senden January 13, 2020 nü Deputy Commissioner Office conference hall, Kiphire nung menogo, ta ketdangsertem osang ka ajanga metetdaktsü.
Vice chairman DPDB aser Deputy Commissioner Kiphire, Sarita Yadav leniba nung iba senden amen.
Deputy Commissioner-i district nung ketdangsertem dang peipei office junga ketdangsütsü aser mapai marurtem osang mapang shidak nung agüjang ta metetdaktsü.
Kiphire DC-isa Board züngsemtem dang DPDB senden nung medentettsüsa kümra jelia sodi meshiba application agütsütsüla, ajisüaka WhatsApp ajanga agütsüba leave bo magizüktsü, ta metetdaktsü.
Deputy Commissioner-i District ketdangsertem dang taruba Republic Day anogomong takok ngua amongtsü atema parnok nem lemzüktsüba mapa tajungtiba nung inyaktsü metetdaktsü.
Senden nung EAC Sadar Kiphire, Chenithung Ovung-i taruba Republic day atema mapalem metetdakja liasü.