Kiphire DPDB senden kaogo

Dimapur, Monupii 08 (TYO): Kiphire district atema ita shia amenba District Planning & Development Board senden DC Conference Hall, Kiphire nung Monupii/May 8, 2018 nü menogo. Iba senden ya Kiphire DPDB mendenpuba aser Soil & Water Conservation Minister, V. Kashiho Sangtam-i ketdangsüa agi.
Iba senden nung Kiphire district kübok sorkar indang office tem nung temelenshi bener arutsü nükjidong nung department balala tajungba küma yanglushitsü aser nüngdakba osettem bener arutsü indang onüktem jembi, aser Minister-i item mapa nung akok tashi yariteptsü lemtet.
ADC Kiphire, Kumar Ramnikant, IAS-i Gram Swaraj Abhiyan sentong aser inyakyim iba senden nung lemsatep aser iba sentong ya Monupii/May 5, 2018 nung tembangogo ta ashi. Gram Swaraj Abhiyan ya yimtsüngtem nung aliba nüburtem pei sasa pei poksünga alitsüba sentong ka lir aser iba sentong ajanga linük nung aliba yimtsüng ajunga ajangzüktsü.
Lok Sabha Election mapang department ajak indang gari amshitsü ta ADC-isa DPDB züngsem dang metetdaktsü. Paisa HoD ajak station nung teti alitsü ajungshi.