Kiphire DPDB senden menogo

Kiphire, Chiteni/July 05 (TYO): July ita atema Kiphire District Planning & Development Board (DPDB) senden July 5 nü Deputy Commissioner indang Conference hall, Kiphire nung menogo.
Vice Chairman aser Deputy Commissioner Kiphire, M. Shayung Phom leniba nung amenba senden nung taoba senden nung lemtetba onüktem reprangshi aser Deputy Commissioner-i züngsemtem dang tesüiba senden asemprong nung madenertem anema temerenshi agütsütsü nenshia metetdaktsü.
SDO (Civil ) HQ Nyempo Wallim-i Kiphire district nung anema alibaren, aluyimba, shisaliok aser gari lenmang onükatem nung jembi. SDO (C)-isa district ketdangsertem dang district nung terenlok mapatem nungittsü mepishi.
Board-isa taküm September ita nung ayongzüka agitsü aliba 16buba Mongmong football Championship atema senotsü teyari agütsütsü asoshi o lemtep.
Iba dak snedakba nung board-i züngsem asemi akümba Committee ka atentet aser iba ciommitte nung Chairman ji Chenithung Ovung EAC (Sadar) aser züngsem anaji DSO aser BDO RD Block Kiphire na shim.
Committee-i district nung tanga department den tongtepratepa inyaktsü. Board-isa Mongmong football championship atema tenla tsükteptsü lemteta liasü.