Kiphire jila nung ESH-i lungkak aitba sentong agi

Dimapur, March April 1 (TYO) : Eastern Sumi Hoho (ESH)-i March 24, 2016 nü Kipheri district administration nem takhangba onük pezü hopta ka tsüngda inyaktsü atema mapang lateta agütsü, saka district administration-i ibaji mapa küma meinyakba atema tanü Kiphire jila nung lungkak aitba sentong ka ayongzüka agi.
April 1, 2016 nü ESH-i ‘silent procession’ ayongzüka agiba nung Kiphire jila nung alir Sumi nungertem KTDSSU, aser Eastern Sümi Totimo/Mother Hoho/ESTH (Kiphire unit) nungertemi shilem agi.
Yimdong sema senzüba sentongji Kiphire deputy commissioner indang office nung tembang aser idakji lungkak aitertemi DC Kiphire den ajurutepa senden ka amen.
Iba senden nung ESH tir, L Kahuvi Sumi-i takhangba agüja alibatem nenshia metetdaktsü aser Kiphire Tuensang District Sümi Students Union (KTDSSU) tir Bothuka Sumi-ia District Administration-i tejak repranga ketdang asüba atema temulung masüba onük benoka lemsatep.
March 2, 2016 nü Seyochung yimtsüng nung Hutokhu Sümi’er ki raksatsü aser iba tatalokba asoshi March 7 nü ki kiburi Police Station Kiphire nung FIR ka benok, saka police-i ken o ji magizük.
Tatem nung ESH-i takhangba onük pezü agütsüba sülen ang March 28, 2016 nü iba FIR agizük.
Tanü senden nung Deputy Commissioner-i ki raksaja aliba yanglushitsü aser iba mapa inyakertem aputsü atema ozüng amer nem tetuyuba agütsütsü nangzük, ta osang angazüker.
Ajisüaka, ki raksatsüa atema temenok agüjang ta ESH-i akhangbabo magizüktettsü ta DC-i metetdaktsü, ta osang ajangasa shisem.