Kiphire & Longleng nung ITI lapoktsü

Kiphire & Longleng nung ITI lapoktsü

Brehostibar nü Dimapur nung Minister of State for Skill Development & Entrepreneurship & Parliamentary Affairs, Govt. of India, Rajiv Pratap Rudy-i Govt ITI ka lapoktsü asoshi longzüng ka sayatsüba noksa nung angur. Pa den Nagaland Chief Minister, T.R.Zeliang, Parliamentary Secretary, Mmhonlumo Kikon aser Social Welfare minister Kiyanelie nungertema angur. (Feb.04 2016.)

Dimapur, Feb. 04 (TYO): Lanurtem asoshi mapa inyakdak lenmang sadema lapoktsütsü atema state nung ITI aser Skill Development center lapoktsü asoshi center sorkar temulungtetba tulu lir, ta tanü center sorkar nung Skill Development & Entrepreneurship minister of State, Wb.Rajiv Pratap Rudy-i metetdaktsü.
Tanü Brehostibar nü Dimapur nung Industrial Training Institute ka lapoktsü asoshi long azüngtsüba sülen Patkai Christian College nung kaketshirtem den külemi “Skilling the Youth of Nagaland” ta asüba onük nung jembidang, Rudy-isa Kiphire aser Longleng nung ITI kaka lapoktsütsü nangzük aser ano Nagaland nungsa International standard nung ITI ka lapoktsütsü, ta metetdaktsü.
Taoba mapang talangka linük nung kaketshisatsü angazükdaktsübaren nung mapa inyak sayutsü asoshibo mebilemi sendoka adok, iba jagi tanü linük nung mapa inyak meteter agi anünger, ta paisa metetdaktsü. Kaketshisatsü angazükba aser mapa inyaktsü angazükba na khenyongi balala, ibaji angateta asenoki mapa inyaktsü angazükba nung temulung tali agütsütsü kanga nüngdaka kümogo, ta Rudy-isa ashi.
Linük nung ato kilonser, Narendra Modi mangdang ataloktsü asoshi pai bilemba sentong “Skill India” takok ngua inyaktettsü asoshi state sorkari shilem tuluba agitsü nüngdaker, center-ibo tenzüka dang yutsütsü anungji itemji state sorkari bener aotsüla ta paisa ashi.
Kasa sentong nung chief minister TR Zeliang-i jembidang, Nagaland nung sorkar mapa nung anioktsü asoshi lenmang mali kümogo, iba jagi lanurtem aika private sectong nung inyak tenzükogo, ibaji temelenshi tajung ka lir ta metetdaktsü.
Paisa ato kilonser Narendra Modi-i linük nung lanurtem asoshi mapa inyak sayuba sentong “Skill India Mission” tenzükba asoshi pelaba metetdaktsü.
Nagaland nung lanurtemi peisasa inyaktetba mapa inyaktsüsa takoktsü lenmang aika lir, iba jagi state sorkaria mapa inyak sayutsübaren nung temulung tali agüja inyaker ta paisa metetdaktsü.
Iba kasa sentong nung Parliamentary Secretary, Labour & Employment, Skill Development aser Border Affairs, Mmhonlumo Kikoni tarur pelaa agizükba o metetdaktsü aser Patkai Christian College Choir-i kongki amshia ken tajung ka aten.

You must be logged in to post a comment Login