Kiphire nung Awareness sentong agi

Dimapur, Mongputeni/October 17 (TYO): District Agromet Unit (DAMU), KVK, Kiphire-i ayongzüka October 17 nü Kiphire district kübok Tethuyo yimtsüng nung Agro advisory services dak sendakba nung aluyimertem atema Awareness sentong ka ayongzüka agiogo.
Sentong nung Temjenna Jamir, SMS(Agro Meteorology)-i, Agro _ Met stations (DAMU) amshia aluyimertem nem IMD (India Meteorological Department)-i tsüngsang mopung indang osang agütsütba indang metetdaktsü. Laisa, weather extremities indang metetdaktsüba den micro region tilatem kong weather parameters balala lir iba indang aluyimertem nem metedaktsü.
Maneni aluyimertem dang Agro Advisory services dak sendakba nung mobile short message services atema parnok indang phone numbers register asütsü koda tongtibang iba indanga metetdaktsü.
Kasa mapang nung Benjungtemsu, VFA-i asükwa mapang kiset shiruru anepalutsüba indang lemsatep. Sentong nungsa food security aser yimtsüng nung chiyongtsü talila bendena ayutsü koda tongtibang iba indang Setsiba Sangtam, DAO (AFA)-i metetdaktsü. Paisa, aluyimertem dang tsüngsarosa mapang tizüktetba tsünüsenpongtsütem tsünütsü asoshi ajungshi. Sentong nung aluyimer parnok ajak agi 63 dena liasü, ta ketdangser sangdong ajanga metetdaktsü.