Kiphire nung ‘Mock Excercise’ agiogo

Kiphire, Metsüremi/March 08, 2022 (TYO): Mongolbar anepdang 11:00 meta Zisaji Presidency Government College Kiphire nung menoknok dak sendakba nung Mock Exercise agiogo. Iba mapang Richter Scale – magnitude 8.7 menoknok anokba yimyatem asadanga, teraksa adokdaktsüba aser teinyaktsütem sayua liasü, ta sangdong ka ajanga metetdaktsü.

Iba Mock Exercise nung SDRF rescue team-i menoknok anokba mapang nisung koma kümzüktsü indang tesayuba agütsü.

Jilushi ajanga item tesayuba agüja liasü, kong menoknok anokba osang angashia, District Operation Team (SDRF)-i menoknok anokba tesem jagi aritepa ao aser nisungtem kümzüktsü asoshi tensa asadanga liasü.

Iba mapang SDRF rescue Team-i menoknok anokba tesem nungi tasümang 2 agitet aser iba lendong nung nisung asem kanga mejungi yiruba den nisung pezü terara yiru aser nisung ka kanga mejungi mi agi ronger aliba kumzüka sayu. Yirur alirtem nem ‘first aid’ agütsü aser mozüki anir oa sayua liasü.

Iba demonstration mapang, SDRF team-i top floor’ nung lendong nung alir tanur ka lisü amshia kümzükba/anir aluba jilushi ka sayu, ta kasa sangdong ajanga ashi.

Maneni, sangdong tanga ka ajanga angazükba agi, Government of Nagaland, Home Department ajanga renemba ama, Hombarnü (07.03.2022) Deputy Commissioner, Conference Hall, Kiphire kübok menoknok nung Tabletop Exercise agia liasü.

Iba sentong nung DC Kiphire, Wati Aier-i ashiba agi, Nagaland aser Northeast region ajunga ‘high seismic zone’ ka nung lir aser item tesem nung menoknok kanga sashia anoktsü lendongbang nung lir.

Mapang shia Nagaland tesem balala nung menoknok anokba nüburtemi ajangshidar aser tarutsü anogotem nung Dimapur nung menoknok tulu adoktsü akok, ta Wati-i bilemba lemsatep.

Item mock exercise ajanga menoknok anokba mapang teraksa adokdaktsüba ajemdaktsütsü mechi angazükba den renema alitsü asoshi pai külem sendaktepa alirtem ajungshia liasü.