Kiphire nung PLs & PLVs Legal Orientation Training agiogo

March 30, 2017 nü D.C Conference Hall, Kiphire nung Kiphire district legal services authority aser Nagaland State Legal Services Authority (NSLSA) senteper ayongba Orientation training nung Sessions Judge & Chairman, Kiphire DLSA, Mayang Lima, S.D.O, Kiphire, APP, Kiphire DLSA züngsemtem, Panel Lawyers, Para Legal Volunteers aser NSLSA nungi Master Trainers & Trainers külemi tangokba noksa ka angur.

Dimapur, March 31 (TYO): March 30, 2017 nü D.C Conference Hall, Kiphire nung Kiphire district legal services authority aser Nagaland State Legal Services Authority (NSLSA) nati senteper Orientation training ka ayongzüka katsüogo.
Iba training tetenzük sentong Asst. Public Prosecutor, Kiphire aser Kiphire DLSA züngsem, Sentila Aier leniba nung agia liasü aser Judge & Chairman KDLSA, Mayang Lima-i okila jembi aser SDO Kiphere, Benjamin, SDO Kiphire-ia jembia liasü.
Iba orientation nung shilem agir parnok ajak agi 35 liasü.
Training nung shilem agirtem telok pezü küma lemsar Akumla Longchari leniba nung shilem agi.
Iba training akaba nükjidong ya PL aser PLVs temi ozüngtem indang shisatsü taliba angutsü aser legal teyari bushirtem yaritsü atema legislations aser Welfare scheme tali rajemdaktsütsü nükjidong nung ayonga liasü.
Okila jembidang Sessions Judge aser Kiphire DLSA Chairman, Mayang Lima-i, tashi maliba kulitem ajanga tang tashi Kiphire district nung Legal Aid Clinic melapokteter, ta metetdaktsü, ajisüaka district nung Para Legal Volunteers (PLVs)-i iba atema meranga inyakba atema pelaba shisem.
Paisa, legal services agutsübaji ajak nem ochi obendang agutsütsü atema lir, anungji iba ama orientation training nung shilem agiba ajanga Para Legal Volunteer temi ozüngtem indang rajema akumtsü, koba ajanga parnoki India Temzüng nung lateta aliba kübok nüburtem yaritettsü, ta ashi.
Mayang-isa, district 11 prongla nung legal teyari nüngdakertem yaritettsü asoshi PLV temi network ka ama inyaktsüla, ta metetdaktsü.
Pai PLV tem dang, teyari bushirtemi temelung lemteta pa/la tebilemtsü lemsateptettsüsa libaliro junga alitsüla, ta ayongzük.
Paisa FIR aser consumer petition nung inoksemtsü atema tongtibang onüktem metetdaktsüba den külemi PLV temi basic laws aser schemes indang junga metetjema alitsüla, ibaji ajanga dang nüburtem melungsüa tenzüktettsü, ta ashi.
Mayang-isa, taruba training session nung PLV temi services aser legal onüktem nung ajangshiba tayongzükba balala indang lemsateptsü, ta metetdaktsü.