Kiphire nungi nisung 44 Kohima aser Dimapur-i anir ao

Dimapur, Monupii/May 7 (TYO): Covid-19 tashidak pokteter aliba ajanga state ajunga anogo 40 nü tashi mokdanga ayuba sülen May 7 nü sorkar tetuyuba dak ajemdaker Kiphire nungi nisung 44 Kohima aser Dimapur-i anir aruogo.
Kiphire toktsür aoertem ajak yashi District Hospital Kiphire nung temang tendangogo aser Kohima aser Dimapur-i aotsüpurtem ajak tema anema lir ta osang agüja liasü.
Kiphire toktsür aoertem apusoba mapang Deputy Commissioner Sarita Yadav IAS den la kübok ketdangsertem aser SP police department densema liasü aser parnoki senzüsenpongba mapang tinyaktsütem aser parnok aliba tesem atongba sülen tinyaktsütem metetdaktsü.
DEF personnel Chorise Sangtam Naik aser Setsiba Sangtam ABC na tawabangba kübok May 7 nü bus pezü nung nisung tem anir Kiphire jila toktsür ogo.