Kiphire o Shamator na tsüngda apuani khaset

Dimapur, Feb. 7 (TYO): Kinungbo o kinungtsü na yasüng Honibar aonung Shamator nungi Kiphire-i oyaa aliba mapang mejangjatetba nisung kari tenapronglaji khasetogo. Tena khasetba tesemji Tuensang district kübok Shamator sub-division nung Shungkiu apu o Sikiur yim na tsüngda liasü.
Iba lendong nung asürtemji GPS Yangzingtong village, Kiphire nung tesayur, Alemba Sangtam aser pa kinungtsü Narola na liasü. Lajia Kiphire mozü kidang nurse liasü.
Tenaji Bolero gari ka nung Shamator nung kinunger kar semdanger külen Kiphire-i meyipa aorba liasü.
Iba lendong atalokba sülen Kiphire town nung telok kari ain adoka MLA T.Torechu’er ki dena ki kar raksatsü aser garia kar rongdoktsü.
Iba amaji meimlaba lendong tulu ataloka aoba agi district administration-i tanü Deobar nikongdang 3:30 nungi Kiphire town nung curfew agütsüogo aser lendong matalokdaktsüi nokdangtsü asoshi sepai talila yokogo.
Iba ama lendong atalokba osang angashia, tanü Deobar nü Yimchunger lokti tentet tongtibangtem Yimchunger Akheru Arihako (YAA), Yimchunger Woman Organization (YWO) aser Western Yimchunger Hoho (WYH) rongdak senden ka lia Honibar aonung Alemba Sangtam o pa kinungtsü Narola na khasetba mapaji kanga sashia aitsüogo aser iba tatalokbaji tejangja meputet tashi long kata memeyip meyutsüi bushitsü ta parnoki metetdaktsüogo.
Yimchunger lokti tentettemisa Kiphire town nung telok kati ain adoka MLA T.Torechu’er ki dena Yimchunger meyong ki raksatsüba mapatemji aitsüogo.
Asüama aser takoksa ngua aliba kibongtem mulung anisüngzükdakja ochi obendang agütsütsü asoshi state sorkar aser ozüng amertemi nisung tepsetertem aser kiojen raksatsürtemji aputsüla, ta Yimchunger lokti tentettemisa metetdaktsü.
Parnokisa yimten bangdak amertemi Kiphire town nung menua curfew magütsüba agi kiojen rongsen aika raksadaktsüba atema taitsüba osang ka metetdaktsüogo. Parnokisa asür kinungertem den mangyim jashi lemsatepba osang ka metetdaktsü.
Ano, sangdong ka nung Tikhir Tribal Council (TTC)-i Alemba Sangtam aser kinungtsü Narola taochi makai tepsetba mapa anema taitsüba osang ka metetdaktsüogo.
Parnokisa sorkar dang YTC lenirtem dang nisung tepsetertemji meshitsüla aser magütsüra parnokji aputsüla, kechiyong kin kecha tangar kin madak mali ajak kasasa dang lir ta metetdaktsü.
Nisung tepsetertemji police-i pua marutetra, onok ajemajemabo melitettsü, anungji onok dang ajungba ka inyaktsüsa akümtsü ta TTC lenirtemisa metetdaktsü. Parnokisa asür kinungertem den mangyim jashi lemsatepba osang ka metetdaktsü.
Iba lendong atalokba osang angazüka, Parliamentary secretary, R.Tohanba-ia tai maketba nisungtem ainlen jajaya alidang tepsetba mapaji kanga sashia aitsür ta metetdaktsü. Iba ama mapa tamajung inyakertemji tanü ama tangatetter aliba tesem nung alitsü metemsü ta paisa ashi. Iba ama mapa tamajungji aija lokti tentet aser kija kibongia shilem agitsüla, ta paisa metetdaktsü.
Nisung tepsetertemji ozüng amer sepaitemi pur tepuokdak ayutsüla aser asür kinungertem den mangyim jashi lemsateper ta paisa metetdaktsü.