Kiphire Town nung Mumgmung benjung mungogo

Kiphire, Rongjui/September 02, 2022 (TYO): United Sangtam Likhum Pumji (USLP)-i Hokolbar anogo Local Ground, Kiphire nung Mungmung Tribal Festival sentong ayongzük. Iba benjungmung sentong nung alakteta tejaoker ama  Deputy Speaker, NLA, T. Yangseo Sangtam dena liasü, ta sangdong ajanga metetdaktsü.

Sangtam kin-i küm nung benjung 12 tashi amunger aser item rongnung Mungmung benjungmung asütsü. Iba benjungmung tetezü togetherness forever lir aser küm shia September ita mezüng hopta nung iba benjung ayongzüker.

Tsüksüngongsüng alitsü asoshi temoatsü meshizüka iba benjungmung amunger aser akialu nung temoatsü alitsü asoshi yimertemi küm piyong meranga inyaker.

Deputy Speaker, NLA, T. Yangseo Sangtam-i, tesünep aser temeimtep nung alitsü; aser pei sobaliba tajung kümzüka ayutsü asoshi Sangtam kin ajungshia liasü.

Mapa tamajung aser tangar bendanga amshiba yimya indoktsü aser yimtenren den lokti nung rongsenketzüng jenjang ajungkettsü asoshi longjemer inyaktsüla, ta pai telok ayongzük.

Iba sentong nung kin balala nungi lennirtem adenba ngua pai tenüngsang agütsü aser Kiphire ya ‘Mini – Nagaland’ lir, kong kin balala tesünep aser yimji-yimjung nung alir, ta pai ashi.

Deputy Commissioner, Kiphire, T. Wati Aier-ia iba sentong nung jembia liasü.

Kiphire district nung kin pezü tsüngda telongjem tali tashiita aotsü aser ibaji ajanga Naga nunger tsüngda longjemtsü asoshi ajungmesotsü imlar, ta pai ashi.

Nübur tsüngda yimji-yimjung ali nungang terenlok alitsü, ta Aier-i shisem.

Iba benjungmung amungba tetezü indang nung ajemdaker Aier-i telok den lemsatep aser Mungmung benjungmung ajanga sobaliba, tsüngsang, oshioben, ken aser yimsü tem wazüka ayutsü asoshi pai ajungshia liasü.

Pei taküm nung meranga inyakba den tali ajemalutsü nüngdaker aser iba den külemi tangatetba lokti ka ama tejakleni aotsü asoshi sorkar tetuyuba nung anidaktsüla, ta DC Aier-isa ashi.

Taruba Mungmung benjungmung sentong nung skill development training ayongzükba den stall balala amenoktsüla, ta Aier-i bilemba ka telok den lemsatep.

Mumgmung benjungmung sentong nung yimtsüng balala nungi cultural troupe temi sobaliba tsüngsang sayuogo, ta kasa sangdong ajanga ashi.