Kipili -i XXI MDFA Trophy 2015 lapoktsütsü

Mokokchung, September 27 (TYO): Mokokchung jila kümer küm 125 ajungba nung shilem ka ama, October 6, 2015 nü nungi tenzüka Mokokchung District Football Association (MDFA)-i ayonga XXI MDFA Trophy 2015 asayamung, Imkongmeren Sports Complex nung asayatsü, ta XXI MDFA, Mokokchung, Media & Publicity Cell nungi Along Longchar-i sangdong ka ajanga metetdaktsüogo.
MDFA trophy ya Mokokchung district nung football asayamung rongnung tulutiba lir aser October 6, 2015 nü Minister of Power, Government of Nagaland, Kipili Sangtam tongti tesemdanger süa iba sentong lapoktsütsü, ta sangdong nungsa shia lir.
Taküm iba asayamung omenji Mokokchung küm 125 ajungba omen ‘Pioneering Ahead’ den kasa lir.
Kasa sangdong ajanga ashiba agi, XXI MDFA Trophy 2015 nung Mokokchung jila nungi club aika den anasa aliba yimtsüng aser jila balala nungi shilem agitsü asoshi züluokogo aser iba asayamung nung takok angurtem nem sen lakh ka den trophy aser certificate aser tanabuba jenjang nem sen 60,000 den trophy agütsütsü.
Tesüiba küm iba asayamung tatembangba asaya nung Fusion FC-i Suyim Sporting Society koka mezüng jenjang nung takok ngua liasü.
Mokokchung küm 125 ajungba dak rangloker tan iba asayamung tanga mapang dang nungi tuluba aser tajungba asütsü imlar.
Jila nung football meimertem ajak iba mapang pei sapuba team asayaba reprangtsü asoshi asayamung tenzüktsü kanga yongyaseta atatepdar, ta MDFA sangdong nungsa shia lir.