Kiralongra anema alima longjema lir, Pak-i magizüker: India

New Delhi, September 22 (Agencies): Bodhbarnü United Nations General Assembly (UNGC) nung Pakistan Ato kilonser, Nawaz Sharif-i jembiba onük aija tanü Ministry of External Affairs (MEA) otongdar, Vikas Swarup-i Sharif-i ‘J&K nung India-i meimchir temeten anema inyakba’ indang jembiba otem metetdaktsü, ajisüaka UN nung tanga linüktem katia iba onük mejembi, ta ashi.
Swarup-i, “Nawas Sharif-i pa indang mapang shilem 80 iba onük nung jembi, ajisüaka UN nung linük shingaia iba atema mejembi,” ta ashi.
Anogo ana tsüngda alima  lenirtem parnok 50-i UN General Assembly nung jembiogo, ta paisa ashi.
Kiralongraba onük nung Pakistan’er tangatetba aija Swarup-i, “UN nung linük ajaki, alima yimjung raksatsü atema amokmeren tulubaji kiralongra lir ta jembi. Tang tashi Pakistan-i ibaji magizüker,” ta ashi.
Tawa tatalokbatem ajanga India-Pakistan Indus Water Treaty reprangshitsü asü ta asüngdangba langzüdang Swarup-i, “Treaty ajak nungji tangatettep aser amalitep nüngdaker,” ta ashi.
India-Pakistan Indus Water Treaty ya linük ana tsüngda 1960 küm India Ato kilonser,  Jawaharlal Nehru aser Pakistan Tir, Ayub Khan nati agia liasü.
Yasüng Pakistan Ato kilonser, Sharif-i UNGA nung minute 20 agia jembidang pai timbaka Kashmir nung army temi tashi alia amshiba aser India-i ozüng alema Kashmir Valley agiba indang jembi. Paisa, Kashmir-i nüchiso akhangbaji Pakistan-i nungiter ta ashi.
Pakistan-i alima sabang aika nung Kashmir indang aiben lepshia jembir, ajisüaka alimai mesükshir. Alima tashi aliba linüktemi Pakistan-i Kashmir indang jembibaji sentoker saka par linüki kiralongraba nungitba atema aitsür.
Sharif-i, Kashmir nung army temi meimchir temeten anema inyakba indang tezüluba nung UN Tir nem agütsüogo ta sangdong. Iba dak sentakba nung Swarup-i, UN Tiri-i item tezüluba nung anguba indang mejembi aser iba onükji linük ana tsüngda bentetang ta shiogo, ta metetdaktsü.
“Pakistan Ato kilonseri UNGA nung onük jembidang tezüluba nung agütsübaji UN Secretary General sangdong nung onoki mangu. Iba onük nung UN adenba shia mali,” ta Swarup-i ashi.
India-ia Pakistan nung meimchir temeten anema inyakba tezüluba nung agütsütsü asü, ta asüngdangba langzüdang Swarup-i, “Item ama tezüluba nung agutsütsü menüngdaker. Kiralongraba nung Pakistan-i senotsü agi yaribaji alima rangbeni meteta dang lir,” ta ashi.