Kiralongra anema longjemer raratsü atema India-i aru: Hollande

New Delhi, January 25 (Agencies): France aser teloktep linüktemi Islamic State kiralongrartem maneni amaktsü atema renema lir, ta Hombarnü France Tir, Francois Hollande-i ashi.

“ISIS-i yimya tamajungtiba nung asenok jazüker,” ta Hollande-isa ashi.

“Ni India semdangbaji kiralongraba anema linük ana tsüngda amalitepa inyaktsü asoshi aru,” ta pai ashi.

“Tanübo, kiralongrartemi amokmerenba tapu ajak lir, aser ibaji India aser France ama linüktem nunga ajangshir, iba den külemi ni ya (India) semdangba ya asen linük ana tsüngda amalitepa longjemer kiralongraba anema raraba nung tashi itshitsü atema aru,” ta France lenirisa ashi.

Paisa, aluyimba aser space nunga rongsenkettsüng tesentaktep tajungba akumtsü atema India aser France linük nati inyaktsü, ta ashi.

France Tir-i anogo asemnü India semdanga arua lir. Pai India semdangba tanabuba anogo nung tanü New Delhi, Rashtrapati Bhawan nung  sentong ka ayongzüka pa agizüka liasü.

Hollande-isa, India Republic Day nung tongti tesemdanger jaokbaji akhüm tulu, ta ashi.

Deobarnü Hollande  tonga aruba mapang Ato kilonser Narendra Modi-i lateta aliba inyakyim raksaa Chandigarh nung pa agizüka liasü.

Yashi Chandigarh nung Ato kilonser Modi-ia, “Ali meimchir tsükchirtem anema raratsü asoshi India aser France na longjema lir,” ta jembia liasü.

Deobarnü Chandigarh nung India-France Business senden nung jembidang Modi aser  Hollande napronglai, linük anapronglai kiralongrartem matsüngdang takoksa nguogo aser tarutsü nung item ama amakba nokdangtsü asoshi longjemer inyaktsü nüngdaker, ta bangjema jembiogo.

You must be logged in to post a comment Login