Kiralongra ya Islam tenüng menüktsütsü atema lir: Rajnath

On Board, April 02 (Agencies): Security sepaitemi kiralongrartem nem tapet meyiptsüdar, ta shia tanü Union Home Minister, Rajnath Singh-i, Muslim nungeria kiralongra ya Islam yimsü menüktsütsü atema lir ta metetogo, ta ashi.
Tayimtsü ajanga Kerala-i aodang pai tayimtsü nung osangbenertem dang, “Muslim nungeria kiralongra ya Islam yimsü tenüng menüktsütsü atema lir ta metetogo. Security sepaitemi kiralongrartem nem tapet meyiptsüdar. Kiralongra anema linük ajak longjema lir,” ta ashi.
Pakistan nung amenoka aliba kiralongrartemi social media ajanga nisungtem ayongdener, ta shia Hokolbarnüa Rajnath Singh-i, Kashmir nunger lanurtem dang kiralongrartemi ajungshibaji mangatsüla, ta jembia liasü.
“Pakistan nung amenoka aliba kiralongrartemi Jammu & Kashmir tensa raksatsür. Onokia tim meyiptsüdar. Telungpurtem anema operation aodang lanurtemi sepaitem dak long agi aonba yimya ka tentetogo. Iba ya Pakistan sepaitemi ajungshiba lir. Ni parnok dang telungpurtemi ajungshibaji mangatsü ajungshir. Pakistan teloktemi nisungtem ayongdentsü atema social media amshir,” ta pai ashi.
Kiralongrar anema sashia inyaktsü, aser India-i iba anema takok angutsü, ta Home minister-isa metetdaktsü.
Yashi Jammu & Kashmir Director General of Police (DGP), S. P. Vaid-ia, telungpurtem mita aodang lanurtemi long amshiba ya Pakistan tai ajanga lir, ta ashi.
“Kashmir aser linük nung yimjung raksatsünertemi social media tim masüba lenmang nung amshir. Tensa raksadang parnoki social media ajanga raraba tesemji tonga arutsü atema lanurtem ajungshir, aser iba mapang nungji kiralongraratem jena odaktsür,” ta Vaid-i ashi.