Kiralongraba anema apuba maparen ochishia inyaktsüla: Bukhari

New Delhi, Feb. 10 (Agencies): Kiralongrar telok ISIS den tesentaktep alitsü südi ta melung melemi Muslim lanurtem jenti apuba dak sentakba nung Jama Masjid, Shahi Imam, Syed Ahmed Bukhari-i Ato kilonser, Narendra Modi dang, kiralongraba dak sentakba nung melung melemi apuba maparen nung ochishia inyakdaktsüner, ta mepishiogo.

Tawa Modi ajurua senden amendang Bukhari-i, kaketshirtem dang Islam mesüra tamangba yimsü ajaki kiralongraba nung shilem magitsüla ta sayutsü atema shisaliok rejutem nung sentong akatsüla, ibaji ajanga tamang yimsü nung ajemdaker parnok memesüzüktettsü, ta ashi.

“Kiralongraba mesüra ISIS den tesentaktep lir südi ta melung melemi nisung apudang security agency temi kanga ochishia inyaktsü ni akhanger. Temelung malemba kija nung ajemdaker Muslim nüburtem anema meinyaktsüla,” ta Bukhari-i ashi.

“Kiralongraba nung densema alirtem anema meinyaktsüla ta onoki mashir, ajisüaka social media nung ajemdaker temelung malemba kija nung nisung maputsüla,” ta paisa ashi.

“Tetenzük nungi lanurtem dang Islam mesüra Hindu, tamangba yimsü kechaia kiralongraba pu masemer ta angatetdaktsütsüla,” ta pai ashi.

Bukhari-isa Ato kilonser Modi dang, iba onük nung mapang shia kaket rejutem nung tesayuba agütsütsüla ta mepishiogo.