Kiralongraba anemba ya tamangba yimsü ka anema masü: Modi

New Delhi, March 18 (Agencies): Islam yimsü ajanga tesünep aser yimjiyimjung osang prokba tenüngsanga tanü Ato kilonser, Narendra Modi-i, Allah tenüng 99 rongnung tenüng kati-i raraba atema menoktaker ta ashiba den külemi kiralongraba anema raraba ya tamangba yimsü ka anema rara ka masü aser kiralongraba o tamangba yimsü na ya mesentakteptsüla, ta ashi.

Tang mezüng World Sufi Forum sentong nung jembidang Ato kilonser Modi-i,  “Alima meimchirtem atema tongtibang mapang ka nung iba ya alima atema tongtibang sentong ka lir. Mepetmesü aser rara aliba mapang ka nung na ji teimla atema tesangwa ka lir. Yimti-yimdong nung lanurtem pelatepba olaji prangpong ajanga nokdangba mapang ka nung nü olaji taneptsüba ola lir,” ta ashi.

Sufism-i Islam tangatetbatem atema noktaker ta ashiba den külemi Modi-i, kiralongraba anema raraba ya tamangba yimsü ka anema masü, ta ashi.

“Kiralongraba anema raraba ya tamangba yimsü ka anema raraba masü. Yamaji masütsü. Iba ya meimchirtem atema aser meimchirtem anema inyakba na tsüngda rara lir. Iba ya sepai, intelligence mesüra diplomatic ajanga dangbo meraratettsü,” ta paisa ashi.

“Iba rara ya asen yimya tajungtem tashi ajanga aser tamangba yimsütem tesayubatem ajanga-a raratettsü. Ni tamalen jembiba ama, asenoki kiralongraba aser tamangba yimsü na mesendaktepdaktsütsüla. Tamangba yimsü tenüng amer kiralongrartemji tamangba yimsü anemertem lir,” ta Ato kilonser Modi-i ashi.

Islam tetezü yimjung lir ta shia Modi-i, “Kodang asenoki Allah tenüng 99 ji shisadangdir ibaji ajanga item tenüng ka ajanga-a raraba aser tashiyim atema menoktaker, aser mezüngbuba tenüng ana ajanga aria bilemba temeim aser taochi sayur,” ta ashi.

Tanü nungi tenzüka anogo pezünü sentong nung linük 20 nungi tejaoker nisung 200 dak tema arua dendar..

Iba sentong nung Egypt, Jordan, Turkey, UK, United States, Canada aser Pakistan densema linük aika nungi tamangba yimsü lenirtem, shisashirtem aser theologian tem dendar.