Kiralongraba aser ozüng alema shibelenba na sentaktepa lir: Pranab

June 26, 2016 nü New Delhi nung ‘International Day against Drug Abuse & Illicit Trafficking’ anogomung nung Tir, Pranab Mukherjee-i yi aser temesepba mozü nokdangtsü atema tanga dangar nungi alakteta junga inyakertem nem National Awards agütsüba noksa nung angur. 

New Delhi, June 26 (Agencies): Asüng Tir, Pranab Mukherjee-i counter-terrorism conference lapoktsütsü lia tanü pai, kiralongrar sentotsü agi yarir linüktem anenjang, ta ashi.
Deobarnü New Delhi nung ‘International Day against Drug Abuse & Illicit Trafficking’ anogomung nung iba onük atema junga inyakertem nem National Awards agütsüba sentong nung jembidang Pranab Mukherjee-i, Kiralongraba, ozüng alema shibelenba aser temesepba mozütem sentaktepa lir, ta ashi.
Yi aser temesepba mozü ajanga India aser alima linüktem loktiliba nung tebilemtsü bener arutsüogo, ta paisa ashi.
Pai award angurtem dang, temelung süa melii maneni item tebilemtsütem anentsü atema meranga inyaktsüla, ta ajungshi.
Iba tebilemtsü atema inyakba atema Mukherjee-i Ministry of Social Justice and Empowerment nema tenüngsang agütsü.
Item tebilemtsü atema lokti tentettem aser melungtet teloktemi sorkar den amalitepa inyaktsü nüngdak, ta paisa ashi.
Iba sentong nung Social Justice & Empowerment Union Minister, Thaawar Chand Gehlot den tongtibang nisung aika dena liasü.