Kiralongraba inyaksangshi ajak samatsütsüla: Pranab Mukherjee

New Delhi, January 20 (Agencies): Kiralongrartem tajung aser tamajung ta melemsatettsü aser kiralongraba inyaksangshi ajak samatsütsüla, ta Tir Pranab Mukherjee-i tanü metetdaktsü.
Tir Pranab-i Pakistan nung kiralongrartemi Bacha Khan University amakba kukua aitsü. Iba lendong nung kiralongrartemi nisung 19 tashi tepset.
“Kiralongrartemi Charasada, Pakistan nung Bacha Khan University amakba osang angashia ni kanga temulung raksar. Lennir Badshah Khan-i yimjung atema inyak aser pa asüba anogomung nung iba tesempatsü mapa inyakba kukua aitsür,” ta Pranab-i sangdong ka nung metetdaktsü.
Iba amakba ajanga kiralongrartem tajung aser tamajung ta kodanga bendanga mamshitettsü ta sayur. Kiralongraba inyakyim ajak meshimeshia samatsütsüla, ta paisa ashi.
Iba lendong nung tasür kibong ajak den asüku lemsateper aser yirua alirtem tekaratiba nung tajungba akümtsü moatsür, ta Tir-isa sangdong ajanga lemsatep.
Pakistan nung Bodbarnü kiralongrartemi Charsadda nung aliba Bacha Khan University amak.
Iba University ya asür Abdul Ghaffar Khan nüngtem nung tenüng jaloktsüba lir. Pa ya 1920s mapang Pashtun independence activist aser pacifist ka liasü aser pa dang Bacha Khan ta aja. Kümshia January 20 nü Abdul Ghaffar Khan tasüba anogo bilemteta amunger.
Tanü university amakbaji Pakistani Taliban-i tenüng agia sangdongogo.