Kiralongraba nungi tamangba yimsü agientsüla: Sushma Swaraj

Manama(Bahrain), January 24 (Agencies): Kiralongraba nungi tamangba yimsü agientsü atema India aser Arab linüktem longjemer mapa inyaktsüla, ta Deobarnü external affairs minister Sushma Swaraj-i ashi.
Ola madoki kiralongrar teloktem yariba linüktem tatem nungbo kiralongrartemi mokbangtsü, anungji iba khuret agientsü atema asenok ajak longjemer inyaktsüla, ta Swaraj-i Arab League linüktem nungi foreign minister tem ayongzük.
Bahrain nung mezüngbuba Arab-India Cooperation Forum Ministerial Meeting nung Swaraj-i ashiba agi, iba senden ya India-i Arab linüktem den tesentaktep akangshiba mapang ka lir.
“Kiralongrartemi tamangba yimsü nung ammeter mapa inyaker, saka tamangba yimsü ajak nungi nisungtemi dak tashiyim mapa inyaker. Anungji asenoki kiralongraba nungi tamangba yimsü agientsüla, kechiyong tamangba yimsü amangertemi külem meimchirtem den temeimtep nung alitsü amanger saka kiralongrartemi külem meimchirtem anema mapa inyaktsü jangrar” ta Swaraj-isa metetdaktsü.
Laisa, India nung nisung balala temeyoktep aika liaka longjema alibaji tatishitsü ka südaktsür alimai tali bilemloka oa inyaksangshiba maparen anema noktaktsü ayongzük.
“India nung tamangba yimsü ajak amangertem lir. Ozü Linük Temzüng nung tamangba yimsü ajak kasa ta lateta lir. Tamangba yimsü ajak kasa ta asübaji temzüng ka dang masü saka anogoshia taküm libaliro nung yimya ka ama amshir” ta Swaraj-isa ashi.

You must be logged in to post a comment Login