Kiralongraba ya ajak atema lendong lir: PM Modi

Pretoria, July 8 (Agencies): Hokolbarnü South Africa yimtiba, Pretoria nung Ato kilonser, Narendra Modi-i, kiralongraba ya ajak atema lendong lir, ta metetdaktsü.
Union Buildings nung South Africa Tir, Jacob Zuma den delegation senden amenba sülen külem osangbenertem senden nung jembidang Modi-i, “Asenok kümküma alitsüla aser kiralongraba anema raratsü atema tesem aser alima den amalitepba alitsüla, ta Tir Zuma-künati hai haura kaogo,” ta ashi.
Modi-isa, India linüki Nuclear Suppliers Group (NSG) züngsem akümtsü benokba nung South Africa-i pusemba atema pai Tir Zuma dang pelaba lemsatepogo, ta ashi.
“Onoki South Africa ama tembar linük dang tamang katettsüla ta onoki meteta lir,” ta Modi-i ashi.
“Alima nung sotetba nüngtugu nisung rongnung ana- Mahatma Gandhi aser Nelson Mandela na nem akhüm agütsütsü atema tang semdangba ya maongka tajung. Gandhi ji India ama South Africa meyonga liasü,” ta Modi-i ashi.
“Asenoki timtema raraba ajanga asen partnership atema tajemdakdak tashi itta lir. Minerals, mining, chemicals aser pharmaceuticals shishilembaba aser investment nunga tesentakatep tajungba akümtsü lenmang lir,” ta paisa ashi.
“Tir Zuma künati alima dak sendakba onüktem aser alimai ajuruba tayongzükbatem nunga amalitepa inyaktsü atema bangjemogo,” ta paisa ashi.
Brihostibarnü Modi Mozambique linük nungi South Africa-i arua liasü.
Modi-i India aser South Africa CEOs den senden ka amentsü, iba sülen pai Constitution Hill, Johannesburg semdangtsü.
Aonung Modi-i Nelson Mandela Foundation semdangtsü aser Johannesburg nung India sensotem den jembiba sülen Durban-i apusotsü.
Honibarnü Modi-i Durban nung Mahatma Gandhi’er Phoenix Settlement semdangtsü aser 1893 küm tatalokba- Mahatma Gandhi sentsü apir pa train ka nungi nungzüka yokba bilemteta Modi-i Pietermaritzburg tashi train nung jajatsü.
Modi-i ano Tanzania aser Kenya na semdangtsü sentong lir.