Kiralongrar akümtsü oya aliba nisung ka apu

Washington, Tsüklai/February 9 (Agencies): New York yimti nung alir arishi küm 29 tain tebur ka Lashkar-e-Taiba (LeT) telok den adentsü asoshi Pakistan-i oya aliba mapang puogo, koba lendong tamaitsü lir. Iba telok yagi Mumbai maka liasü aser tang parnok US nunga inyaksangshidar.
Kasa mapang nung Texas nung alir asangur chanu kati social media amshia iba kiralongraba telok atema nübuyimja aliba puteta FBI-i pa puogo.
Federal prosecutors-i Hokolbarnü ashiba agi parnoki Manhattan nung alir Jesus Wilfredo Encarnacion, Brehostibarnü aonung pa Pakistan-i aotsü lia John F Kennedy International Airport nung puogo.
Prosecutor temi ashiba agi, Encarnacion-i online ajanga iba kiralongraba telok nung adentsü meranga liasü. Encarnacion-i November ita nisung ka dang 2008 küm Mumbai amakba Pakistan nungi kiralongraba telok den pa sendaktepner ta ashi.
“Ni nisung tepsetner. Ni injang agi khaner aser tekolak tangner,” ta Encarnacion-i undercover agent ka dang ashi.
“Encarnacion-i Pakistan nung kiranglongrar telok ka den adentsü merang aser tangar nisung ka den iba telok nem osettsüt balala agütsütsü asoshi meranga liasü,” ta Assistant Attorney General John Demers-i ashi.
“Encarnacion-i nisung tepsettsüba aser tekolak atangtsüba jangraba lemsatepba dang masü pa tera agidang Pakistan-i oa kiralongrar ka maküm,” ta FBI Assistant Director-in-Charge William Sweeney Jr-i ashi.
Kasa mapang nung Texas nung alir arishi küm 18 tain Michael Kyle Sewell anema FBI-i ken o benok. Pai social media amshia LeT pur nübo yimtsü aser parnok terrorist training atema Pakistan-i yoka liasü.
New York nung alir ka apuba aser Texas nung asangur chanu ka anema keno benokba ajanga US nung law enforcement agencies tem anokshitsüogo.
Iba nisung apuba ajanga US nung kiralongrar adokba jangjatsüogo, koba Mumbai amakba sülen ketdangsertemi kanga tsübua liasü.