Kiralongrar anema India aser France longjema lir: Hollande & Modi

Chandigarh, January 24 (Agencies): Kiralongrar anema maneni raratsü ta shia tanü Ato kilonser Narendra Modi-i, “Ali meimchir tsükchirtem anema raratsü asoshi India aser France na longjema lir,” ta ashi.
Deobarnü Chandigarh nung India-France Business senden nung jembidang Ato kilonser Modi aser France Tir, Francois Hollande nati, linük anapronglai kiralongrartem matsüngdang takoksa nguogo aser tarutsü nung item ama amakba nokdangtsü asoshi longjemer inyaktsü nüngdaker, ta ashi.
Modi-i, “Kiralongrartemi Paris (France yimtiba) amakba anogo nung, Republic Day parade nung tongti tejaokerji France nungi asütsüla ta ni telemtetba agi,” ta ashi.
“France-i parnok tangatetba onüktem aser terenlok lenmang nungi matsüngshii kiralongrar den raratsü lenmang sayuogo,” ta Modi-isa ashi.
Republic Day parade nung tongti tesemdanger asütsü atema agizükba asoshi Modi-i Hollande dang pelaba lemsatep.
Ato kilonserisa, linük anapronglai senteper rongsenkettsüng nung tajangzük angutsü atema inyaktsü koka lir, ta ashi.
“India ya alima nung rongsenkettsüng tekaratiba ainba linük lir. Nenok products atema onük ket nung nübo aser market lir. India’er sempet aser France’er manufacturing senteper aika ajangzüktettsü. India nung mapa ashirtem nüboji tongti tashi ka asütsü. Onok mapa ashirtem nübo ajanga jenjang ajemtsü aser quality tajungba akümtsü. France dak senotsü lir.  India-i ibaji nüngdaker aser shishilembadaka lir,” ta ashi.
France lenir Hollande-i India den maneni tesentaktep tajungba yanglunüa, “Modi den tesentaktep nung ni tamang akar. Ni India den partnership yangluner aser Modi-i France semdangba mapang lemtetbatem mapa küma inyakner,” ta ashi.
Tanü India aser France na tsüngda onük 16 nung tezüngzüktep agiogo, iba nungji Chandigarh ya smart city ka küma yanglutsü densema lir.
Tanü Modi aser Hollande nati Chandigarh nung Rock Garden sema senzüba sülen Capitol Complex, Government Museum aser Art Gallery semdanga liasü.