Kiralongrar anema raratsü atema sen mn 440 tenlatsü nangzüker: Abe

Vientiane, September 07 (Agencies): Asia nung tentetba linüktemi kiralongrar anema raratsüren nung yariteptsü nükjidong nung Japan sorkari dollar sen million 440 tenlatsü renemba osang ka Japan Ato Kilonser, Shinzo Abe-i tanü, Bodbar nü sangoktsüogo.
Islamic State (IS) ta ajaba kiralongrar tetsüti den sentaktepba kiralongrar telok kati Philippines Tir, Rodrigo Duterte’er Davao jila nung bomb lendong tesashi ka atalokdaktsüba ajanga nisung 14 tashi taoba hopta tepsetba aser Bangladesh yimtiba, Colombo nunga nisung 22 tashi taküm July ita poksetdakja lendong atalokdaktsüba densema, Asia nung kiralongrartemi lendong kanga sashia atalokdaktsütsü tenzükba osang bushiteta lir.
“Asia nung ozüng alema inyaker aser kiralongrartem anema raratsü mapatong nung yariteptsü nükjidong nung ozü linüki taruba küm 3 tsüngda nung dollar sen million 440 agütsütsü nangzüker,” ta tang Laos yimtiba, Vientiane nung temendak Association of Southeast Asian Nations (ASEAN) lenir senden nung Abe-i metetdaktsü.
Japan-i agütsütsü nangzükba teyari senji Asia linük koba nem agütsütsü iba osang mejangjai lir saka kiralongrar anema raratsü mapatong den sentaktepa, biometric identification system aser pokshitsü osettsüset bushitettsü osettsüset tajungtiba amshitsü sentong renemba osang angazükogo.