Kiralongrar anema raratsüren nung alima lungjemtsüla: Putin

Bamako, November 21 (Agencies): Alima ajungai ka küma lungjemer kiralongrar anema raratsü tayongzükba olen ka Russia Tir, Vladimir Putin-i tanü Honibar nü sangoktsüogo.

Jihadist kiralongrartemi Africa northwest tsütsü Mali nung tentetba tongti hotel ka tashiyim agi agia yashi nisung 19 tashi tepseta lendong atalokdaktsüba sülen Putin-i tanü iba tayongzükbaji alima dang metetdaktsü.

IS teloki France yimtiba, Paris nung nisung 130 shi tepseta lendong atalokdaktsür hopta ka shi lir külen Bamako nung tentetba Radisson Blu hotel nung yashi lendongji atalok.

Tesüiba mapang France yimsüsütsü kübok densemba Mali linük nung yashi lendong atalokdaktsüba atema Al Mourabitoun aser al Qaeda in the Islamic Maghreb (AQIM) kiralongrartemi tenüng agia metetdaktsüogo.

“Yashi asürtem rong nung Russia sensoa 2 tashi densemba osang jangjaogo,” ta Russia Foreign Ministry otongdar, Maria Zakharova-i osang jangjashitsü.

Egypt kübok Sinai peninsula nung Russia nunger tayimtsü ka taoba October ita tsükokdaktsür ajunga pua parnok nem ozüngi melaba ama tapet temerenshi agütsü tenangzükba ka Putin-i tan Mongolbar nüa metetdakja lir.

Egypt nung tayimtsü tsükokdaktsüba lendong nung nisung 224 tashi asüba osanga jangjaogo.

Ano külen, China Tir, Xi Jinping-ia yashi Mali nung lendong atalokdaktsürtem aitsüba olen ka tanü Honibar nü metetdaktsüogo.

Yashi lendong nung asür rong nung China nungera nisung 3 tashi densemba osang bushiteta lir.

“Tan Mali nung lendong atalokdaktsüba ajanga alimai amalitep lia kiralongrartem anema raratsü temulungtetba ayutsü nungdaka kümogo. Mali nung tentetba kiralongrar ajunga meshimeshia samatsütsü maparen nung ozü US-i Mali sorkar den yariteptsü mulunga lir,” ta US Tir, Barack Obama-ia metetdaktsüogo.