Kiralongrar indang rongsen lenmang shibangtsütsü: G7

Akiu, May 21 (Agencies): Group of Seven (G7) ta ajaba tenteti kiralongrartem indang rongsen lenmang shibangtsütsü maparen taoba mapang nungi tesashiba inyaktsü telemtetba ka tanü, Honibar nü agiogo.
G7 nung densemba linük 7 nungi Finance lenirtemi Japan anüdoklentip tsütsülen, Akiu nung tanü senden ka amendang iba telemtetbaji agiba osang jangjaogo.
Tan senden nung shilem agirtemi par linük 7 rong nung kiralongrartemi renemba rongsen angutsü lenmang den sentakba osangtsüsang lemsateptsü, kiralongrartemi arrtsü adena rongsen belenshiba maparen nokdangtsü aser kiralongrar nem rongsen teyari agütsürtem bushitettsü nangzüktepa liasü.
Japan tiyontsülen, Ise region nung G7 Summit taruba hopta amenba jakdang G7 Finance lenirtemi tan sendenji amener lir.