Kiralongrar nem nuclear tongpang oset magütsütsüla: Obama

Washington, April 02 (Agencies): Kiralongrartemi nuclear tongpang oset amshia lendong atalokdaktsüba ajanga alima kanga mejungi küma melenshitsütsü ta shia, kiralongrartemi nuclear tongpang oset bena arutsü lenmang ajunga nokdangtsü olen ka US Tir, Barack Obama-i yashi, Hokolbar nü metetdaktsü.
“Syria aser Iraq na nung lendong kanga sashia atalokdaktsüba Islamic State (IS) telok densema, alima tesem balala nung tentetba kiralongrartemi tongpang nung amshitsü nuclear oset ngutetra, ibaji alima asoshi lendong tulutiba asütsü,” ta pai ashi.
US kübok Washington nung tan Brehostibar aser Hokolbar nü ayonga amenba 4 buba Global Nuclear Security Summit nung shilem agidang Obama-i iba olenji metetdaktsü.
Japan, China, South Korea aser US densema, alima linük 50 dak tema nungi lenirtemi tan senden nung shilem agiba osang jangjaogo.
Ajisüaka, Russia linükibo shilem magitsü lemteta, Russia Tir, Vladimir Putin-i tan senden nung shilem magi süidaktsü.
Ano, Pakistan Ato Kilonser, Nawaz Sharif-ia par Pakistan kübok Lahore nung pokshiba lendong tesashi ka atalokba yong tan senden nung shilem magitettsüsa akümba osang angazükogo.
Tan senden nung shilem agirtemi North Korea-i tenzüka aliba nuclear oset yanglua kasaji rizüngtsü mapatong nokdangtsü onüka benoka jembiba osang jangjaogo.
“Alimai tongpang nung amshitsü nuclear osettsüset yanglutsü osettem bendentsü maparen agientsü tenzükogo,” ta shia, South America-i iba alizüng ajangzükba osang lemsatepba den külemi, Central Europe aser South East Asia natia taküm 2016 küm tatem tashi nung iba alizüng ajangzüktsü renemba osang Obama-i lemsatepa liasü.
Alima tangatetba melenshia aka, Indian subcontinent aser Korean peninsula na nungbo nuclear tongpang oset yanglua kasaji rizüngtsü maparen tangasa teinyakdak aliba olen ka paisa metetdaktsüogo.