Kiralongrar nem US amokmemerendaktsütsü: Obama

Tawa California kübok San Bernardino nung nisung 14 tashi injang agi kaseta lendong ataloktsür, Tashfeen Malik (Abelen) aser Syed Farook na indang noksa yangi angur. (San Bernardino, December 05)

Washington, December 05 (Agencies): Kiralongrar nem US amokmemerendaktsütsü tenangzükba olen ka US Tir, Barack Obama-i tanü Honibar nü metetdaktsüogo.
California kübok San Bernardino nung nisung 14 kasetba den külemi, nisung 21 shi yiruja kiralongrar anati tawa lendong atalokdaktsüba sülen Obama-i tanü iba tenangzükba olenji sangoktsü.
“Alima nung kiralongrar telok tetsüti, Islamic State (IS) telok nungi ajizüka, tawa San Bernardino nung lendong tulu atalokdaktsüogo. Ajisüaka, iba lendongji kechiba atalokdaktsü iba osang mebushitet tashi ozü ketdangsertemi bushisüngdangtsü,” ta pai ashi.
“US densema, alima tesem ajunga nung kiralongratsü asoshi IS-i nüburtem ajungmesor ta asenoki meteta lir. Anungji, tarutsü mapang nung tan amala lendong matalokdaktsütsü asoshi sorkar, police, lokti aser tamangba yimsü lenirtemi külemi lungjemer inyaktsüla,” ta Obama-i ayongzük.
Ano külen, tan San Bernardino nung lendong atalokdaktsür 2 – US nung asor Muslim nunger arishi küm 28 tain Syed Farook aser pa kinüngtsü, Pakistan tsür arishi küm 29 tain Tashfeen Malik na police-i kasetba osang jangjaogo.
Tan amala lendong ataloktsütsü merangba kiralongrartem aputsü asoshi US sorkari tentetba Federal Bureau of Investigation (FBI) ketdangsertemia nungdakba bushisüngdang tenzüka lir.
Tan lendong atalokba dak ajemdaker par US nung tongpang nung amshitsü prangpong injang den sentakba ozüng takangba aser tesashiba latetshitsü asoshi Obama-i tanü ayonga liasü.
US nung alir nisung mashi kati tongpang nung amshitsü prangpong aser injang alizüka ayutsü temeten agüja lir.
“San Bernardino nung lendong atalokdaktsüri mitkartemi amshiba assault prangpong amshia lendong atalokdaktsüba osang bushitetogo. Tan lendong atalokdakba sülen nüburtem nem prangpong injang alizüka amshitsü temeten ulura agütsüba ajanga lendong bener arutsür ta kuli angur. Anungji asen linük nung prangong injang den sentakba temzüng latetshitsü nungdaka kümogo,” ta Obama-isa shisem.